क्रीडा आयुक्तांच्या देखरेखीखालीही निवड होणार
म.टा. क्रीडा प्रतिनिधी, मुंबई
जोधपूर येथे २५ डिसेंबरपासून होणाऱ्या राष्ट्रीय सबज्युनियर जिम्नॅस्टिक्स स्पर्धेसाठी आज (२० डिसेंबर) पुण्यातील बालेवाडी येथे निवड चाचणी आयोजित करण्यात आली असली तरी २१ डिसेंबरलाही राज्याच्या क्रीडा आयुक्तांच्या देखरेखीखाली आणखी एक चाचणी होणार आहे. या दोन चाचण्यातून २२ सर्वोत्तम खेळाडूंची निवड राष्ट्रीय स्पर्धेसाठी केली जाणार आहे. त्यानंतरही महाराष्ट्रातल्या जिम्नॅस्टिक्समधला गोंधळ थांबतो का, हे पाहणे औत्सुक्याचे ठरेल.
रत्नागिरीत १३ ते १५ डिसेंबर या कालावधीत संजय शेट्ये अध्यक्ष असलेल्या राज्य जिम्नॅस्टिक्स संघटनेच्या राज्य स्पर्धेतून संघ निवडण्यात आला होता. पण फेडरेशनने महाराष्ट्रातील जिम्नॅस्टिक्समधील दोन गट लक्षात घेता २० डिसेंबरला सर्व मुलांसाठी खुली चाचणी ठेवली. पण महाराष्ट्राचे क्रीडा आयुक्त ओमप्रकाश बकोरिया यांच्या देखरेखीखाली २१ डिसेंबरला रत्नागिरीत सहभागी झालेल्या मुलांची पुन्हा चाचणी घेण्यात येईल आणि २० व २१ डिसेंबरच्या चाचण्यांमधून सर्वोत्तम २२ खेळाडूंचा संघ राष्ट्रीय स्पर्धेसाठी पाठविला जाईल, असे बकोरिया यांनी 'मटा'शी बोलताना सांगितले. महत्त्वाचे म्हणजे फेडरेशनच्या देखरेखीखाली २० डिसेंबरची चाचणी होणार आहे. त्यातूनच पूर्ण संघ पाठविला जाणार का की २१ तारखेच्या चाचणीचाही विचार केला जाणार हे आता पाहायचे.