हरयाणाची यू मुम्बावर सरशी

चेन्नईः अखेरच्या टप्प्यात अनुपकुमारने जोरदार चढाया केल्या खऱ्या; पण दुसऱ्या बाजूने त्याला काशिलिंग आडकेची म्हणावी तशी साथ लाभली नाही. त्यातच प्रतिस्पर्धी खेळाडूंच्या पकडी करण्यातही यू मुम्बाचे खेळाडू कमी पडले. त्यामुळे प्रो-कबड्डी लीगमध्ये हरयाणा स्टिलर्सचे आव्हान परतवून लावण्यात यू मुम्बाला अपयश आले. हरयाणा स्टिलर्सने सांघिक खेळाच्या जोरावर यू मुम्बावर ४१-३० अशी मात केली.

जवाहरलाल नेहरू इन्डोअर स्टेडियममध्ये ही स्पर्धा सुरू आहे. सुरुवातीला दोन्ही संघांनी बचावात्मक खेळ केला. त्यामुळे पहिल्या पाच मिनिटांच्या खेळात केवळ ३-३ अशी बरोबरी होती. अकराव्या मिनिटाला अनुपकुमारने चढाईत तीन गुणांची कमाई करून यू मुम्बाला १०-८ अशी आघाडी मिळवून दिली. मात्र, ही आघाडी काही त्या संघाला टिकवता आली नाही. पूर्वार्धात हरयाणा संघाकडे २२-१६ अशी आघाडी होती. ही पिछाडी भरून काढण्यात यू मुम्बाच्या खेळाडूंना शेवटपर्यंत यश आले नाही. त्याचबरोबर त्यांना दोन वेळा लोण स्वीकारावा लागला.

दोघांच्या खेळाचा तुलनात्मक अभ्यास केला, तर चढाईत हरयाणाने २४, तर यू मुम्बाने २३ गुण मिळवले. पकडीत हरयाणाने ११, तर मुम्बाला केवळ तीनच गुण मिळाले. मुम्बाच्या सुरिंदरसिंगला ९ पैकी एकदाच यशस्वी पकड करता आली, तर कुलदीपसिंगनेही पकडीत निराशा केली. हरयाणाकडून दीपककुमार दाहिया (८ गुण), विकास कंडोला (८ गुण), वझीरसिंग (७ गुण), सुरेंदर नाडा (५), मोहित चिल्लर (४ गुण) यांनी विजयात मोलाचा वाटा उचलला. ‘अ’ गटात या विजयानंतर हरयाणा संघ ६४ गुणांसह दुसऱ्या स्थानावर आहे. १९ सामन्यांतील त्या संघाचा हा दहावा विजय ठरला. यू मुम्बा संघ ५४ गुणांसह चौथ्या स्थानी असून, १९व्या सामन्यातील त्या संघाचा हा नववा पराभव ठरला.