हरयाणाची लखनऊ मोहिम फत्ते

Digambar.Shingote@timesgroup.com

Tweet : @DshingoteMT

लखनऊ : प्रो-कबड्डी लीगमधील काळजाचा ठोका चुकविणाऱ्या लढतीत हरयाणा स्टिलर्सने दबंग दिल्लीवर २७-२५ अशी मात केली. यासह हरयाणा स्टिलर्सने लखनऊतील दोन्ही लढती जिंकून मोहीम फत्ते केली. गेल्या सामन्यात हरियाणाने यजमान युपी योद्धाला हरविले होते.

बाबू बनारसी दास स्टेडियममध्ये हा चौथा टप्पा सुरू आहे. दबंग दिल्ली आणि हरयाणा स्टिलर्स हे अ विभागातील संघ आमनेसामने होते. नीलेश शिंदेने हरयाणाच्या सुरजित सिंगची पकड करत दबंग दिल्लीचे गुणांचे खाते उघडले. त्यापाठोपाठ अबोफझलने चढाईत सुरेंदर नाडाला बाद करत दबंग दिल्लीला चांगली सुरुवात करून दिली. सहाव्या मिनिटाला दोन्ही संघांत ३-३ बरोबरी होती. त्यानंतर हरियाणाने पकड मिळविण्यास सुरुवात केली. दहाव्या मिनिटाला हरियाणा स्टिलर्सने दबंग दिल्लीवर लोण चढवून ११-३ अशी भक्कम आघाडी घेतली. दीपककुमार दहिया आणि सुरजितसिंग यांच्या चढाया आणि नीरज कुमारच्या पकडींच्या जोरावर हरयाणा स्टिलर्सने मध्यंतराला १७-९ अशी आठ गुणांची आघाडी कायम राखली होती.

उत्तरार्धात शुभम पालकरने चढाईत हरियाणा स्टिलर्सच्या राकेशसिंगला बाद केले. त्यापाठोपाठ सुरजितची पकड करत दबंग दिल्लीने पिछाडी भरून काढण्यास सुरुवात केली. मेराज शेखनेही चढायांत सुरेंदर नाडा आणि नीरज कुमार यांना बाद केले. त्या वेळी हरियाणावर लोणचे सावट होते. उत्तरार्धातील दहाव्या मिनिटांपर्यंत हरयाणाकडे २१-१९ अशी आघाडी होती. त्यानंतर नीलेशने खंडोलाची पकड करून पिछाडी कमी केली. साडेतीन मिनिटांचा खेळ बाकी असताना दहियाची पकड करत दिल्लीने २४-२४ अशी बरोबरी साधली. दोन मिनिटांचा खेळ बाकी असताना मेराज शेखने सुरेंदर नाडाला बाद करत दिल्लीला २५-२४ आघाडी मिळवून दिली. मात्र, त्यानंतर नीलेश शिंदे आणि विराज लांडगेचा हरयाणाच्या सुरजितच्या पकडीचा प्रयत्न फसला आणि हरियाणाला २६-२५ असी आघाडी मिळाली. अखेरीस मेराजचीही पकड झाली. या विजयासह हरियाणा स्टिलर्स संघ पुणेरी पलटणला मागे टाकून दुसऱ्या स्थानावर पोचला.