वृत्तसंस्था, नवी दिल्ली
ज्युनियर जागतिक सुवर्णपदक आणि नंतर आशियाई स्पर्धेत दिमाखदार कामगिरीनंतर भारताची युवा अॅथलिट हिमा दासला आगामी आंतरखंडीय स्पर्धेसाठी विश्रांती देण्याचा निर्णय भारतीय अॅथलेटिक्स फेडरेशनने घेतला आहे. शनिवारपासून चेक प्रजासत्ताक येथे ही प्रतिष्ठेची स्पर्धा होत आहे. या आंतरखंडीय स्पर्धेत नीरज चोप्रा (भालाफेक), अरपिंदरसिंग (तिहेरी उडी), मोहम्मद अनास (४०० मीटर), जिन्सन जॉन्सन (८०० मीटर), सुधा सिंग (महिला ३००० मीटर स्टिपलचेस), पी. यू. चित्रा (महिला १५०० मीटर) हे खेळाडू सहभागी होणार आहेत.
आंतरराष्ट्रीय अॅथलेटिक्स फेडरेशनच्या या हंगामातील अखेरच्या स्पर्धेत हिमा सात भारतीय महिलांसह खेळणार होती. ८ आणि ९ सप्टेंबरला चेक प्रजासत्ताकमधील ओस्त्रावामध्ये ही स्पर्धा होणार होती. आता तिच्याजागी ऑस्ट्रेलियाची अॅनेलिस रुबी सहभागी होणार आहे.
आंतरखंडीय स्पर्धा ही युरोप, आफ्रिका, अमेरिका आणि आशिया पॅसिफिक या चार खंडात होते. पुरुष आणि महिलांमध्ये १८ विविध प्रकारात खेळाडू सहभागी होतात. शिवाय, ४ बाय ४०० मीटर मिश्र रिलेचाही त्यात समावेश असतो.
आशियाई स्पर्धेत हिमा दुखापतग्रस्त होती. पण एका प्रशिक्षकाच्या मते ती दुखापतग्रस्त नाही. भरगच्च अशा कार्यक्रमानंतर तिला विश्रांतीची गरज होती. तिची कारकीर्द आताच सुरू झाली आहे, तेव्हा तिला जपणे आवश्यक आहे. तिच्यावर अधिक भार पडू नये, याची काळजी घ्यावी लागेल.
हिमाने २०१६मध्ये धावायला सुरुवात केली, पण या कमी कालावधीत तिने मोठी झेप घेतली आहे. फिनलंडमध्ये तिने जागतिक अजिंक्यपद युवा स्पर्धेत सुवर्ण जिंकले. महिलांच्या ४०० मीटरमध्ये तिने दोन राष्ट्रीय विक्रम मागे टाकले. आशियाई स्पर्धेत महिलांच्या रिले संघाच्या सुवर्णविजेत्या व मिश्र रिलेच्या रौप्यविजेत्या कामगिरीत हिमाचे मोठे योगदान होते.