वृत्तसंस्था, नवी दिल्ली
भारताची आघाडीची धावपटू हिमा दास हिने अथलेटिकी मितिंक रायटर स्पर्धेतील महिलांच्या ३०० मी. धावण्याच्या शर्यतीत सुवर्ण पटकावले, तर पुरुष गटात भारताच्याच महंमद अनसने बाजी मारली. चेक प्रजासत्ताकमध्ये ही स्पर्धा झाली.
'चेक प्रजासत्ताकमधील अॅथलेटिकी मितिंक रायटर स्पर्धेतील महिलांच्या ३०० मी. धावण्याच्या शर्यतीत अव्वल स्थानावर राहिले,' असे ट्विट हिमाने शर्यत जिंकल्यानंतर केले. अनसने पुरुषांच्या ३०० मी. धावण्याच्या शर्यतीत ३२.४१ सेकंद वेळ नोंदविली. अनसने 'ट्विट'मध्ये म्हटले की, चेक प्रजासत्ताकमधील स्पर्धेत ३२.४१ सेकंद वेळेसह सुवर्ण पटकावल्याने आनंद झाला आहे.'राष्ट्रीय विक्रमवीर अनस हा जागतिक स्पर्धेतील ४०० मी. धावण्याच्या शर्यतीसाठी पात्र ठरला आहे. जागतिक स्पर्धा दोह्यात सप्टेंबर-ऑक्टोंबरमध्ये होणार आहे. हिमाला मात्र अद्याप जागतिक स्पर्धेसाठी पात्र ठरता आलेले नाही. युरोपियन शर्यतींत २ जुलैपासून हिमाने आतापर्यंत सहा सुवर्णपदके पटकावली आहेत. हिमाने २ जुलैला पोझनान अथलेटिक्स ग्रांप्रीमधील २०० मी. धावण्याची शर्यत २३.९५ सेकंद वेळेसह, ७ जुलैला कुत्नो स्पर्धेत (पोलंड) २०० मी. शर्यत २३.९७ सेकंद वेळेसह, १३ जुलैला क्लादनो स्पर्धेतील (चेक प्रजासत्ताक) २०० मी. शर्यत २३.४३ सेकंद वेळेसह, १७ जुलैला टाबोर स्पर्धेतील (चेक प्रजासत्ताक) २०० मी. शर्यत २३.२५ सेकंद वेळेसह, तर २० जुलैला नोव मेस्टो स्पर्धेतील (चेक प्रजासत्ताक) ४०० मी. शर्यत ५२.०९ सेकंद वेळेसह जिंकली होती. जागतिक स्पर्धेसाठी महिलांच्या ४०० मी. धावण्याच्या शर्यतीसाठी ५१.८० सेकंद, तर २०० मी. धावण्याच्या शर्यतीसाठी २३.०२ सेकंद पात्रता निकष आहे.