‘कोलकाता’-‘केरळ’मध्ये‘आयएसएल’ची सलामी

मुंबई : गतविजेता अॅटलेटिको डी कोलकाता आणि उपविजेता केरळ ब्लास्टर संघ यांच्यात इंडियन सुपर लीग फुटबॉल स्पर्धेतील चौथ्या मोसमातील सलामीची लढत रंगणार आहे. ही लढत १७ नोव्हेंबरला कोलकात्यातील विवेकानंद स्टेडियममध्ये होणार आहे.
या मोसमात एकूण ९५ सामने खेळले जाणार आहेत. त्याचबरोबर या वेळी दहा संघ विजेतेपदासाठी झुंजताना दिसणार आहेत. यात बेंगळुरू एफसी आणि जमशेदपूर एफसी या दोन संघांची भर पडली आहे. चौथ्या मोसमाचे वेळापत्रक शुक्रवारी जाहीर करण्यात आले. सर्व दहा संघ एकमेकांविरुद्ध घरच्या मैदानावर आणि प्रतिस्पर्धी संघाच्या मैदानावर खेळतील. ४ मार्चपर्यंत साखळीच्या लढती चालतील. यानंतर उपांत्य फेरीच्या लढती होतील. याच्या तारखा आणि स्थळ नंतर जाहीर करण्यात येणार आहेत. सोमवार आणि मंगळवार विश्रांतीचे दिवस असणार आहेत, तर रविवारी दोन लढती होतील. एफसी पुणे सिटी आणि मुंबई सिटी एफसी ही मोसमातील पहिली ‘महाराष्ट्र डर्बी’ लढत २९ नोव्हेंबरला पुण्यात म्हाळुंगे-बालेवाडी येथील शिवछत्रपती क्रीडानगरीत खेळली जाणार आहे. या स्पर्धेसाठी १० क्लबनी मिळून १३२.७५ कोटी रुपये लावले आहेत. यात ७७ आंतरराष्ट्रीय आणि १६६ देशांतर्गत खेळाडू सहभागी होणार आहेत. या मोसमापासून अंतिम अकरामध्ये पाचच परदेशी खेळाडू खेळविण्यात येणार आहेत.
…