‘कठीण परिस्थितीत झगडण्यास मजा येते...’

नवी दिल्लीः कठीण परिस्थितीशी जिद्दीने झगडून दणदणीत पुनरागमन करताना खूप मजा येते..., वर्ल्डकप नेमबाजी स्पर्धेतील भारताचा सुवर्णपदक विजेता जितू राय सांगत असतो. मंगळवारही त्याने रखडत का होईना १० मीटर पिस्तूलच्या फायनलमध्ये प्रवेश मिळवला होता. बुधवारीही त्याने ५० मीटरच्या फायनलमध्ये भरीव कामगिरी करून पिछाडी भरून काढत पदकावर नाव कोरले. यावेळी त्याचा आनंद गगनात मावत नव्हता; कारण पदकाचा रंग ‘सुवर्ण’ होता.

‘पाठिराख्यांच्या साक्षीने सुवर्णपदक पटकावण्याचा आनंद खूप मोठा आहे. पदक प्रदान सोहळ्यात जेव्हा आपला तिरंगा सर्वात उंच फडकतो त्याक्षणी आम्हा अॅथलिट्सना आयुष्याचे सार्थक झाल्यासारखे वाटते’, छोट्या चणीचा जितू सांगत असतो.

२०१६च्या मोसमाचा अखेर जितूने वर्ल्डकप रौप्यपदकाने केला होता अन् २०१७ मोसमाची सुरुवात वर्ल्डकप सुवर्णपदकाने झाल्याने ही स्वारी खूषीत आहे. २९ वर्षांच्या जितूचे गेल्या दोन दिवसांतील हे दुसरे वर्ल्डकप पदके ठरले आहे. मंगळवारी जितूने १० मीटर पिस्तूलमध्ये ब्राँझची कमाई केली होती. त्यावेळीही त्याने पिछाडी भरून काढत पदक निश्चित केले होते.

‘बुधवारीही मी पिछाडीवर पडलो होतो. मात्र खेळाची हीच गंमत असते. आव्हानात्मक परिस्थितीशी दोन हात करून जिंकलो की खूप मजा येते. बुधवारी मी पिछाडी भरून थेट अव्वल क्रमांक मिळवला’, असे वर्ल्ड चॅम्पियनशिप आणि एशियाड विजेता जितू सांगतो.

यंदाच्या मोसमात जितू सर्वच वर्ल्डकप स्पर्धांमध्ये भाग घेणार आहे. यानंतर म्युनिचला वर्ल्डकप आहे. तिथे रवाना होण्याआधी आपल्या खेळातील काही कळीच्या मुद्यांवर काम करण्याचे जितूने ठरवले आहे.