उच्च न्यायालयः चित्राला संघात घ्या...

कोचीः केरळ उच्च न्यायालयाने शुक्रवारी केंद्र सरकारला आदेश दिले आहेत की, पी. यू. चित्रा हीचा लंडनमध्ये रंगणाऱ्या जागतिक अॅथलेटिक्स स्पर्धेतील प्रवेश निश्चित झालाच पाहिजे. न्यायाधिश पी.बी.सुरेशकुमार यांनी अंतरिम आदेश काढत सरकारला अॅथलिट चित्रासाठी हवी ती व्यवस्था करण्यास सांगितले आहे. कोर्टाने असेही निरीक्षण नोंदवले आहे की, पुढील महिन्यात रंगणाऱ्या लंडन वर्ल्ड चॅम्पियनशिपसाठी जी संघ निवड करण्यात आली आहे त्या निवडीत पारदर्शकता नव्हती. यामुळे बरेच गुणी आणि क्षमता असलेले अॅथलिट दुर्लक्षित राहिले.

गुरुवारीच न्यायालयाने चित्राला संघाबाहेर ठेवण्याचे स्पष्टीकरण केंद्राकडे मागितले होते. केरळच्या चित्राने अलीकडेच भुवनेश्वर येथे पार पडलेल्या आशियाई अॅथलेटिक्स चॅम्पियनशिपमधील १५०० मीटरच्या शर्यतीत सुवर्णपदक पटकावले आहे. निवड न झाल्याने तिनेच याचिका दाखल केली होती. आशियाई चॅम्पियनशिपमधील सुवर्णपदक विजेती कामगिरीच आपल्याला वर्ल्ड चॅम्पियनशिपच्या संघातील प्रवेशासाठी पुरेशी आहे, असे चित्राने आपल्या याचीकेत नमूद केले आहे.

या लढाईत केरळचे मुख्यमंत्री पिनरई विजयन यांनीही चित्राला पूर्ण पाठिंबा दिला.