गिफू (जपान) : भारताने ज्युनिअर आशियाई अॅथलेटिक्स अजिंक्यपद स्पर्धेत पाच सुवर्णपदकांसह तिसरे स्थान पटकावले. या स्पर्धेत भारताने पाच सुवर्ण, दोन रौप्य आणि १० ब्राँझपदके मिळवली. जपानने चौदा सुवर्णपदकांसह अव्वल, तर चीनने १० सुवर्णपदकांसह दुसरे स्थान मिळवले.
यात कमलराज कनगराज आणि अजित कुमार यांनी अनुक्रमे तिहेरी उडी आणि ५ हजार मीटरमध्ये सुवर्णपदक मिळवले. त्याचबरोबर मुलींच्या ४ बाय ४०० मीटर रिले संघाने रौप्यपदक मिळवले. यानंतर महिलांच्या २०० मीटर धावण्याच्या शर्यतीत जिस्ना मॅथ्यूने ब्राँझपदक मिळवले. मुलांच्या तिहेरी उडीत १९ वर्षीय कमलराजने १५.७५ मीटर कामगिरी नोंदवून अव्वल स्थान मिळवले. कमलराजला तिसऱ्या प्रयत्नाच्या वेळी दुखापत झाली आणि त्याच्या पदकाच्या आशा जवळपास संपुष्टात आल्या होत्या. मात्र, त्याच्या पहिल्या प्रयत्नाच्या उडीने त्याला सुवर्णपदक मिळवून दिले. यानंतर ५ हजार मीटर धावण्याच्या शर्यतीत अजित कुमारने १४ मिनिटे १५.२४ सेकंद अशी वैयक्तिक सर्वोत्तम वेळ नोंदवून अव्वल स्थान मिळवले. मुलींच्या ४ बाय ४०० मीटर शर्यतीत सलग तिसरे सुवर्णपद मिळवण्यात भारताला यश आले नाही. जिस्ना मॅथ्यू, सुभा वेंकटेसन, निधी आणि रचना यांनी ३ मिनिटे ४१.११ सेकंद वेळ नोंदवून ब्राँझपदक मिळवले. यानंतर जिस्नाने २४.४८ सेकंद वेळ नोंदवून मुलींच्या ४०० मीटर शर्यतीत ब्राँझपदक मिळवले.