HWL: भारताने जर्मनीला नमवत पटकावले कांस्य

भुवनेश्वर: भारताने झुंझार जर्मनीचा २-१ असा पराभव करत हॉकी वर्ल्ड लीग फायनल स्पर्धेच्या कांस्य पदकावर आपले नाव कोरले. ओडिशाची राजधानी भुवनेश्वरच्या कलिंगा स्टेडियम येथे झालेल्या या सामन्यात भारताकडून एसव्ही सुनीलने २० व्या मिनिटाला गोल करत भारताला आघाडी मिळवून दिली. परंतु, मार्क अॅपलने ३६व्या मिनिटाला गोल डागत आपल्या संघाला बरोबरीत आणले.

हरमनप्रीत सिंहने ५४व्या मिनिटाला पेनल्टी कॉर्नरवर गोल करत भारताला सामन्यात निर्णायक बढत मिळवून दिली.

जर्मनीने मात्र आज आपल्या खेळाचे शानदार प्रदर्शन करत दर्शकांची मने जिंकली. ऑस्ट्रेलियाविरुद्ध सेमीफायनलमध्ये जर्मनीकडे गोलकीपरसह एकूण १३ खेळाडूच राहिले होते. आज स्थिती आणखी खालावत त्यांच्याकडे मैदानात उतरण्याजोगे केवळ ११ खेळाडूच राहिले होते हे विशेष. म्हणजेच जर्मन संघ संपूर्ण सामन्यात आपले खेळाडू कल्पकतेने खेळवूच शकला नाही. सामन्यानंतर काही जर्मन खेळाडू अतिशय थकले. त्यापैकी काही खेळाडू तर मैदानावरच आडवे झाले.

पहिल्या हाफनंतर भारतीय संघ १-० ने पुढे होता. मात्र जर्मनीचा संघदेखील जशास तसे उत्तर देत होता. आज भारतीय संघाच्या बचावात अनेक कमतरताही दिसून आल्या. भारतीय संघाने जर्मनी संघाला एकानंतर एक असे अनेक पेनल्टी कॉर्नर दिले. पहिल्या दोन क्वॉर्टरमध्येच चार वेळा ऑलिम्पिक चॅम्पियन राहिलेल्या या संघाला सहा पेनल्टी कॉर्नर मिळाले होते. तथापि, जर्मन संघाला कोणत्याही संधीचा फायदा घेता आला नाही. याचे श्रेय भारतीय गोलकीपर सूरज काकेराला आणि जर्मनीचा मजबूत ड्रॅगफ्लिकर आणि कप्तान मार्टिन हॅनरच्या अनुपस्थितीला द्यावे लागेल हे नक्की.

बिग बी अमिताभ बच्चन यांच्याकडून भारतीय संघाचे अभिनंदन
T 2737 - CONGRATULATIONS INDIA !! beats Germany in World Hockey league .. for Bronze !! What an amazing progress for Indian Hockey .!! NEXT league World Champions ! reliving past glory ! COME ON INDIA 🇮🇳🇮🇳🇮🇳 pic.twitter.com/tfuPC7TG0k — Amitabh Bachchan (@SrBachchan) December 10, 2017