‘कुठल्याही संघाला आव्हान देण्याची क्षमता’

मुंबई : ‘भारतीय पुरुष फुटबॉल संघ सध्या चांगल्या फॉर्मात असून, कुठल्याही संघाला आव्हान देण्याची क्षमता भारतीय संघात आहे,’ असे मत भारतीय फुटबॉल संघाचे प्रशिक्षक स्टीफन कॉन्स्टन्टिन यांनी व्यक्त केले.

मागील १३ लढतींपैकी भारतीय संघाने ११ लढती जिंकल्या आहेत. यामुळे जागतिक फिफा क्रमवारीत भारतीय संघ १००व्या स्थानी पोहोचला आहे. प्रशिक्षक स्टीफन म्हणाले, ‘आताचा संघ तयार करण्यासाठी आम्हाला दोन वर्षे लागली. त्यामुळे आता या संघाची कुठल्याही संघाविरुद्ध लढण्याची क्षमता आहे.’ भारतीय संघाच्या या यशाचे रहस्य काय, असे विचारले असता, स्टीफन म्हणाले, ‘मला नाही वाटत असे काही रहस्य आहे ते. स्वत:वरील विश्वास आणि मेहनत या जोरावर या संघाची बांधणी झाली आहे. ज्या वेळी संघाला मार्गदर्शन करायला मी सुरुवात केली होती, तेव्हाच मी म्हटले होते की एक मजबूत संघ एका आठवड्यात किंवा महिन्यात तयार होणार नाही.’

आगामी एएफसी एशियन कप पात्रता फेरीतील लढतीसाठी भारतीय संघाचे सराव शिबिर सुरू आहे. स्टीफन म्हणाले, ‘आमची प्रतिस्पर्धी संघाविरुद्ध लढण्याच्या तयारीत प्रचंड सुधारणा झाली आहे. प्रतिस्पर्धी संघाविरुद्ध कशा योजना आखणार, याचा विचार आम्ही शिबिरात करत असतो. प्रत्येक खेळाडूची क्षमता बघून त्याची पोझिशन निश्चित केली जाते. तुम्हाला मैदानातून आमचे सराव शिबिर सोपे वाटत असेल, पण मुळात तसे नसते. सरावासाठी आम्ही जीपीएस पद्धतीचाही वापर करीत आहोत. त्याचाही खेळाडूंना फायदा होतो.’