भारत उपांत्य फेरीत

बेंगळुरू : येथील कांतिरवा स्टेडियममध्ये सुरू असलेल्या महिलांच्या आशिया कप बास्केटबॉल स्पर्धेत भारताने अपेक्षेप्रमाणे ब डिव्हिजनच्या उपांत्य फेरीत धडक मारली. गटसाखळीत श्रीलंका आणि उझबेकिस्तान यांच्यावर सहज मात केल्यानंतर उपांत्यपूर्व फेरीत भारताने फिजीचा ९३-५१ असा पराभव करून उपांत्य फेरीत प्रवेश केला. आता उपांत्य फेरीत भारताची गाठ लेबॅनॉनशी पडणार आहे.

भारत आणि फिजी यांच्यातील लढत एकतर्फी होणार अशीच अटकळ होती आणि तसाच त्या लढतीचा निकाल लागला. भारतातर्फे कर्णधार पॉलदुराईने १९, तर राजगणपतीने १० गुणांची कमाई केली. भारताने पहिल्या क्वार्टरमध्ये १९-११, दुसऱ्यात २३-१२, तिसऱ्यात २५-१६ अशी आघाडी कायम ठेवत चौथ्या क्वार्टरमधये २६-१२ अशी बाजी मारली आणि सामना खिशात घातला.

उपांत्यपूर्व फेरीत लेबॅनॉनने श्रीलंकेवर ८६-३७ तर उझबेकिस्तानने सिंगापूरवर चुरशीच्या सामन्यात ८४-७९ असा विजय मिळविला. उपांत्य फेरीत आज २८ जुलैला लेबॅनॉन-भारत आणि उझबेकिस्तान-कझाकस्तान अशा लढती होतील. कझाकस्तानने थेट उपांत्य फेरीत प्रवेश मिळविला होता.

चीन-जपान, कोरिया-ऑस्ट्रेलिया लढती

महत्त्वाच्या अ डिव्हिजनमध्ये कोरियाने न्यूझीलंडवर ६४-४९, ऑस्ट्रेलियाने उत्तर कोरियावर ८१-४८, चीनने फिलिपिन्सला ११७-४३स जपानने तैपेईला ७३-५७ असे पराभूत करत उपांत्य फेरीत प्रवेश केला. आता या गटात उपांत्य फेरीत कोरिया-ऑस्ट्रेलिया व चीन-जपान अशा चुरशीच्या लढती चाहत्यांना पाहायला मिळणार आहेत. अ डिव्हिजनमधील चार संघ बास्केटबॉल वर्ल्डकपमध्ये खेळणार आहेत.