इंग्लंडकडून भारताचा पराभव

वृत्तसंस्था, जोहान्सबर्ग

भारतीय महिला संघाला ‘हॉकी वर्ल्ड लीग सेमी-फायनल’ स्पर्धेच्या उपांत्यपूर्व फेरीत इंग्लंडकडून १-४ असा पराभव पत्करावा लागला. मिळालेल्या संधींचा फायदा घेण्यात भारतीय महिला पुन्हा एकदा अपयशी ठरल्या.

जागतिक क्रमवारीत भारत बाराव्या, तर इंग्लंड दुसऱ्या स्थानी आहे. या लढतीत इंग्लंडचेच पारडे जड मानले जात होते. इंग्लंडने आपल्या लौकिकाला साजेसा खेळ केला. त्यांच्या आक्रमक खेळासमोर भारताचा निभाव लागला नाही. इंग्लंडकडून गिसेल अन्सॅली (६ मि.), अॅलेक्स डॅन्सन (१३ मि.), सुसानाह टाउन्सेंड (४२ मि.) आणि हनाह मार्टिन (६० मि.) यांनी गोल केले. भारताकडून एकमेव गोल गुरजित कौरने (५७ मि.) केला. मात्र, त्याचा निकालावर काहीही परिणाम झाला नाही. आता भारत पाचव्या ते आठव्या क्रमांकासाठीच्या लढतीत खेळेल.

इंग्लंडने सुरुवातीपासूनच भारतीय संघावर वर्चस्व राखले. इंग्लंडला सलग तीन पेनल्टी कॉर्नर मिळाले. त्याचे पेनल्टी स्ट्रोकमध्ये रुपांतर झाले. याचा फायदा घेत अन्सॅलीने सहाव्याच मिनिटाला गोल करून इंग्लंडला आघाडी मिळवून दिली. यानंतर अॅलेक्सने गोल करून इंग्लंडची आघाडी वाढवली. दुसऱ्या सत्राच्या सुरुवातीलाच भारताला पेनल्टी कॉर्नर मिळाला. मात्र, यावर गोल करण्यात भारतीय महिलांना अपयश आले. लढतीच्या २८व्या मिनिटाला भारताला पुन्हा पेनल्टी कॉर्नर मिळाला. मात्र, ही संधीही भारताला साधता आली नाही. दुसऱ्या सत्राअखेर इंग्लंडकडे २-० अशी आघाडी कायम होती. तिसऱ्या सत्रात सुसानाहने गोल करून इंग्लंडला ३-० अशी आघाडी मिळवून दिली. चौथ्या सत्राच्या सुरुवातीला भारताने आक्रमक खेळ केला खरा; पण त्याचा फायदा झाला नाही. लढत संपायला तीन मिनिटांचा खेळ शिल्लक असताना भारताला पेनल्टी कॉर्नर मिळाला. यावर गुरजितने गोल केला. अखेरच्या मिनिटाला इंग्लंडने चौथा गोल केला आणि ही लढत ४-१ अशी जिंकून उपांत्य फेरी गाठली.