ताश्कंद : भारताची आज (रविवार) २३ वर्षांखालील गटाच्या एएफसी अजिंक्यपद फुटबॉल स्पर्धेच्या पात्रतेच्या दुसऱ्या फेरीत ताजिकिस्तानविरुद्ध लढत होईल. भारताला पहिल्या लढतीत गतविजेत्या उझबेकिस्तानकडून पराभव स्वीकारावा लागला. त्यामुळे भारतासाठी ही लढत 'करा अथवा मरा' स्वरुपाची असणार आहे. या सामन्यात आम्ही सर्वोत्तम कामगिरी करू असा विश्वास प्रशिक्षक डॅरेक परेरा यांनी व्यक्त केला. परेरा म्हणाले, 'उझबेकिस्तानचे खेळाडू शारीरिकदृष्ट्या आमच्यापेक्षा मजबूत होते. त्याचबरोबर त्यांचे तंत्र ही आमच्यापेक्षा सरस होते. आमच्या संघ तसा नवखाच आहे. पहिल्या सत्रात आम्हाला गोल करण्याच्या दोन संधी मिळाल्या होत्या. मात्र, ही संधी साधता आली नाही. आता या सामन्यात मिळालेल्या संधीचे सोने करण्याचा आमचा प्रयत्न असेल.'
...
आफ्रिकेचा विजय
सेंच्युरियन : रीझा हेन्ड्रिक्स आणि व्हॅन डेर दुसेनच्या अर्धशतकानंतर गोलंदाजांनी केलेल्या अचूक माऱ्याच्या जोरावर दक्षिण आफ्रिकेने मालिकेतील दुसऱ्या टी-२० क्रिकेट सामन्यात श्रीलंकेवर १६ धावांनी मात केली. यासह दक्षिण आफ्रिकेने तीन सामन्यांच्या मालिकेत २-० अशी विजयी आघाडी घेतली. संक्षिप्त धावफलक : दक्षिण आफ्रिका - २० षटकांत ३ बाद १८० (रीझा हेन्ड्रिक्स ६५, व्हॅन डेर दुसेन ६४, जीन पॉल ड्युमिनी नाबाद ३३, लसिथ मलिंगा १-२६) वि. वि. श्रीलंका - २० षटकांत ९ बाद १६४ (उदाना नाबाद ८४, परेरा २२, डिकवेल २०, मॉरिस ३-३२, स्टेन २-३४, शामसी २-१६).
...
मलिंगा होणार निवृत्त
सेंच्युरियन : श्रीलंकेचा मर्यादित षटकांचा कर्णधार आणि वेगवान गोलंदाज लसिथ मलिंगा हा पुढील वर्षीच्या टी-२० क्रिकेट वर्ल्ड कपनंतर निवृत्त होणार आहे. इंग्लंडमध्ये होणाऱ्या आगामी वनडे क्रिकेट वर्ल्ड कपनंतर मलिंगा वन-डेतूनही निवृत्त होणार आहे. यानंतर तो टी-२०त कायम खेळणार आहे. ३५ वर्षीय मलिंगाने शुक्रवारी दक्षिण आफ्रिकेविरुद्धच्या टी-२० सामन्यानंतर याबाबत माहिती दिली. मलिंगाने २१८ वनडे ३२२ विकेट घेतल्या असून, ७२ टी-२० त्याच्या नावावर ९७ विकेट आहेत.
...