भारताला दहा सुवर्णपदके

नवी दिल्लीः भारताने कोलम्बो येथे पार पडलेल्या दक्षिण आशियाई ज्युनियर टेबल टेनिस चॅम्पियनशिपमध्ये सगळीच दहा सुवर्णपदके पटकावली आहेत. येथील माँट लॅव्हिनिया येथे ही स्पर्धा पार पडली. या सुवर्णपदकासह भारताने चार रौप्यपदकांचीही कमाई केल्याने स्पर्धेतील भारताच्या पदकांची संख्या १४वर गेली आहे. तीन दिवस रंगलेल्या या स्पर्धेच्या पहिल्या दोन दिवशी भारताने दोन सुवर्णपदके खिशात टाकली होती. स्पर्धेच्या अखेरच्या दिवशी भारताने दुहेरीच्या दोन स्पर्धा व उर्वरित सर्वच एकेरीच्या स्पर्धांमध्ये सुवर्णपदकांवर नाव कोरले. भारतासह यजमान श्रीलंकेनेही पदके जिंकली. बहुतेक गटांमध्ये ब्राँझपदकावर समाधान मानावे लागले ते श्रीलंकेला.

ज्युनियर मुलांच्या फायनलमध्ये अव्वल सीडेड मानव ठक्करने पार्थ विरमानीला ११-६, ६-११, ११-७, ११-९ असे हरवत जेतेपदाला गवसणी घातली आहे. दिल्लीकर पार्थला रौप्यपदक लाभले. तर श्रीलंकेच्या पी.डी याचे ब्राँझवर समाधान झाले. ज्युनियर मुलींच्या जेतेपदाच्या झुंजीत अव्वल सीडेड अर्चना गिरीश कामतने दुसऱ्या सीडेड प्रियांका परीकवर ११-९, ११-५, ११-७ असा सहज विजय मिळवत सुवर्णपदक जिंकले.