ललित भानोतसह नऊ जणांची आयओए समिती

समन्वयासाठी बात्रा यांचा निर्णय

वृत्तसंस्था, नवी दिल्ली

नवी दिल्लीत २०१०मध्ये झालेल्या राष्ट्रकुल क्रीडा स्पर्धेतील घोटाळ्यात समावेश असलेल्या आणि नंतर एक वर्षाचा तुरुंगवास भोगलेल्या तसेच २०१४मध्ये झालेल्या भारतीय ऑलिम्पिक संघटनेच्या (आयओए) निवडणुकीत उभे राहण्यास मज्जाव करण्यात आलेल्या ललित भानोत यांना पुन्हा एकदा आयओएमध्ये बस्तान बसविण्याचा मार्ग खुला करण्यात आला आहे. आयओएचे अध्यक्ष नरिंदर बात्रा यांनी क्रीडा मंत्रालय आणि भारतीय क्रीडा प्राधिकरण (साई) यांच्यात समन्वय साधण्यासाठी नऊ सदस्यीय समिती स्थापन केली आहे. त्यात बात्रा यांच्या अध्यक्षतेखाली ललित भानोत, आर. के आनंद (कार्याध्यक्ष), राजीव मेहता (निमंत्रक), आनंदेश्वर पांडे, रणधीर सिंग, तरलोचन सिंग, अनिल खन्ना, सुधांशू मित्तल आदिंचा समावेश या समितीत असेल.

या समितीची ताकद वाढविण्याची आवश्यकता असेल तर ती वाढविली जाईल, असेही बात्रा यांनी स्पष्ट केले आहे.

राष्ट्रीय क्रीडा संघटनांना ज्या समस्यांना सामोरे जावे लागते त्याविषयी क्रीडा मंत्रालयाला योग्य माहिती मिळावी या उद्देशाने ही समिती स्थापन केल्याचा दावा बात्रा यांनी केला आहे. राष्ट्रकुल स्पर्धा, आशियाई क्रीडा स्पर्धा आगामी काळात आहेत, ते लक्षात घेऊन या समितीचा घाट घालण्यात आला आहे.