कॅनबेरा : भारतीय ज्युनिअर हॉकी संघाला तिरंगी स्पर्धेतील अखेरच्या सामन्यात यजमान ऑस्ट्रेलियाकडून १-२ असा पराभव स्वीकारावा लागला. मात्र, गुणतालिकेमध्ये सात गुण आणि गोलफरकांसह भारतीय संघ अव्वल आहे. त्यामुळे, भारत आणि ऑस्ट्रेलिया यांच्यातच अंतिम सामना होणार असून, भारतीय संघ विजेतेपदासाठी प्रयत्नशील आहे. ऑस्ट्रेलियाने १५ मिनिटात गोल करत आघाडी मिळवली होती. मात्र, भारताच्या गगनदीप कौरने ५३व्या मिनिटांना गोल करत बरोबरी साधली होती. मात्र, ऑस्ट्रेलियाकडून ५६व्या मिनिटांनी गोल करत पुन्हा विजयी आघाडी मिळविण्यात यश मिळवले.
तिरंगी स्पर्धा
मुंबई : भारतीय महिला संघाचा समावेश असणाऱ्या १७ वर्षांखालील फुटबॉल तिरंगी स्पर्धेला १३ डिसेंबरपासून सुरुवात होत आहे. या स्पर्धेमध्ये थायलंड आणि स्वीडन हे संघ सहभागी होत आहेत. पुढील वर्षी भारतात होणाऱ्या १७ वर्षांखालील फिफा वर्ल्ड कप स्पर्धेची पूर्वतयारी म्हणून या स्पर्धेकडे पाहण्यात येत आहे. या वयोगटातील भारतात होणारी ही पहिलीच स्पर्धा असल्याचे भारतीय फुटबॉल महासंघाकडून सांगण्यात आले.
शेन वॉर्नला समभाग
मेलबर्न : पहिल्या आयपीएल स्पर्धेमध्ये राजस्थान रॉयल्सकडून ऑस्ट्रेलियाचा फिरकीपटू शेन वॉर्नला फ्रँचायजीमधील समभागही दिले होते. वॉर्ननेच एका वृत्तपत्राला दिलेल्या मुलाखतीमध्ये ही माहिती दिली. 'त्यावेळी मी आंतरराष्ट्रीय क्रिकेटमधून निवृत्त झालो होतो आणि मी राजस्थान रॉयल्सचे नेतृत्व करावे, अशी इच्छा व्यवस्थापनाने व्यक्त केली होती. त्यासाठी मला सहा लाख ५७ हजार डॉलर्स आणि दरवर्षी ०.७५ टक्के मालकी हक्क देण्यात आले होते,' असेही त्याने सांगितले.