वृत्तसंस्था, कोलकाता
भारतीय महिला कम्पाउंड तिरंदाजी संघाने जागतिक क्रमवारीत अव्वल स्थानावर पोहोचून इतिहास रचला आहे. पुढील महिन्यात होणाऱ्या आशियाई स्पर्धेपूर्वी घडलेल्या या घटनेने भारतीय महिला कम्पाउंड संघाचा आत्मविश्वास नक्कीच उंचावला असणार. आशियाई स्पर्धेला इंडोनेशिया येथे १८ ऑगस्टपासून सुरुवात होत आहे.
अंताल्या आणि बर्लिन वर्ल्ड कप स्पर्धेत भारतीय महिला संघाने रौप्यपदक मिळवले. त्याचा फायदा भारतीय महिलांना क्रमवारीत झाला. महिलांच्या कम्पाउंड सांघिकच्या क्रमवारीत भारतीय संघ ३४२.६ गुणांसह अव्वल स्थानावर आहे. दुसऱ्या स्थानावर असलेल्या चायनीज तैपेईचा संघापेक्षा भारत सहा गुणांनी आघाडीवर आहे. ज्योती सुरेखा वेन्नम आणि मुस्कान किरर या दोघींचा वर्ल्ड कपमध्ये भारतीय महिला संघात समावेश होता. संघातील तिसरी सदस्य म्हणून दिव्या धायल (अंताल्या) आणि त्रिशा देब (बर्लिन) यांचा समावेश होता. भारतीय तिरंदाजी संघटनेने अमेरिकेतील सॉल्ट लेक सिटीत झालेल्या स्टेज-३मध्ये भारतीय संघच पाठविला नाही. गेल्या वर्षी मेक्सिकोत झालेल्या वर्ल्ड चॅम्पियनशिपमध्ये कम्पाउंड सांघिकमध्ये भारतीय महिलांनी रौप्यपदक जिंकून इतिहास रचला होता. भारताने २०१४च्या इंचिऑन आशियाई स्पर्धेत पुरुष आणि महिला कम्पाउंड संघाने अनुक्रमे सुवर्ण आणि ब्राँझपदक मिळवले होते.
महिला कम्पाउंड संघ प्रथमच क्रमवारीत अव्वल स्थानावर पोहोचला आहे. यापूर्वी दीपिकाकुमारी महिला रिकर्व्ह क्रमवारीत अव्वल स्थान पटकावले होते. सध्या कम्पाउंड मिश्र प्रकारात भारतीय संघ पाचव्या स्थानावर आहे. कोरियाचा संघ अव्वल स्थानावर असून, डेन्मार्क दुसऱ्या स्थानी आहे. रिकर्व्ह मिश्रमध्ये भारत सातव्या स्थानावर आहे. रिकर्व्ह पुरुष सांघिकमध्ये भारतीय संघाची बाराव्या स्थानावर घसरण झाली असून, रिकर्व्ह महिला सांघिकमध्ये भारताने आठवे स्थान कायम राखले आहे. कम्पाउंड पुरुष सांघिकमध्ये भारत सातव्या स्थानी आहे.
...
कम्पाउंड महिला सांघिक
क्रमांक संघ गुण
१ भारत ३४२.६
२ चायनीज तैपेई ३३६.६
३ कोलंबिया ३०२.३
४ अमेरिका २८४.५
५ कोरिया २८१.६
...
१९ - रिकर्व्ह पुरुष गटात भारताचा अतनू दास जागतिक क्रमवारीत १९व्या स्थानावर आहे.
७ - रिकर्व्ह महिला गटात दीपिकाकुमारी सातव्या स्थानावर असून, प्रोमिलाला १५व्या स्थानावर आहे.
७ - कम्पाउंड पुरुष गटात अभिषेक वर्माची सातव्या स्थानावर घसरण झाली आहे.
१४ - कम्पाउंड महिला गटात ज्योती सुरेखा वेन्नमची १४व्या स्थानावर घसरण झाली आहे.
...