करोनाग्रस्तांसाठी सहा महिन्यांचा पगार देणार 'हा' खेळाडू

करोनाग्रस्तांच्या मदतीसाठी आता खेळाडूही पुढे सरसावता दिसत आहेत. भारताचा माजी सलामीवीर आणि भाजपाचा खासदार गौतम गंभीर पुढे सरसावला आहे. गंभीरने करोनाग्रस्तांसाठी ५० लाख रुपयांची मदत जाहीर केली आहे. त्याचबरोबर भारताच्या पदक विजेत्या खेळाडूने आपला सहा महिन्यांचा पगार करोनाग्रस्तांसाठी देण्याचे जाहीर केले आहे.

बजरंग पुनिया हा भारताचा कुस्तीपटू आहे. बजरंगने जागतिक अजिंक्यपद कुस्ती स्पर्धेत कांस्यपदक पटकावले होते. सध्याच्या घडीला तो ऑलिम्पिकची तयारी करत होता. पण आता आपला सहा महिन्यांचा पगार त्याने करोनाग्रस्तांसाठी देण्याचे ठरवले आहे. बजरंगने ही माहिती आपल्या ट्विटरच्या माध्यमातून दिली. ही माहिती दिल्यावर त्याचे आभार भारताचे क्रीडा मंत्री किरेन रिजिजू यांनी मानले आहेत.

यावेळी बजरंग म्हणाला की, " ऑलिम्पिकपूर्वी आपण करोना व्हायरसला कसे हरवू शकतो, हे पाहायला हवे. त्यामुळे मी माझा सहा महिन्यांचा पगार हरयाणा करोना रिलिफ फंडला समर्पित करत आहे."


बजरंग हा रेल्वेमध्ये स्पेशल ड्युटी ऑफीसर म्हणून काम करत आहे. आपला सहा महिन्यांचा पगार त्याने हरयाणा सरकारला द्यायचे ठरवले आहे.
करोनाचा कहर जगभराबरोबर भारतातही सुरु आहे. त्यामुळे भारतातील काही राज्यांमध्ये संचारबंदीही लागू केली आहे. दिवसेंदिवस करोनाग्रस्तांची संख्याही वाढत आहे. त्यामुळे त्यांच्या उपचारांसाठी पैसे कमी पडू नयेत, यासाठी गंभीरने ५० लाख रुपयांची मदत केली आहे.

गंभीरने दिल्लीचे मुख्यमंत्री अरविंद केजरीवाल यांना एक पत्र लिहिले आहे. या पत्रामध्ये गंभीरने म्हटले आहे की, " करोनाग्रस्तांसाठी वैद्यकीय मदत आपल्या राज्याला लागू शकते. करोनाग्रस्तांसाठी जी वैद्यकीय उपकरणे लागतील त्यासाठी मी माझ्या खासदार निधीतून ५० लाख रुपयांची मदत राज्य सरकारला करत आहे.

गंभीर हा एक सजग खासदार आहे, असे म्हटले जाते. कारण जेव्हा संचारबंदी लागली होती तेव्हाही त्याने लोकांना घरी राहण्याचे आवाहन केले होते. सरकारचे नियम पाळायला हवेत, ते तुमच्या भल्यासाठीच आहेत. पण जर हे नियम पाळणार नसाल तर तुम्हाला तुुरुंगातही जावे लागू शकते, असे गंभीरने म्हटले होते.