वृत्तसंस्था, नवी दिल्ली
भारताची युवा नेमबाज मनू भाकेर हिने आयएसएसएफ स्पर्धेत दोन वेळा वर्ल्ड कप फायनल्स स्पर्धेतील विजेत्या अलेक्झांड्रा झॅवाला हिला मागे टाकून सुवर्णपदकाची कमाई केली. या स्पर्धेतील हे भारताचे दुसरे सुवर्णपदक ठरले. भारताच्या रवीकुमारने ब्राँझपदक मिळवले. यामुळे पदकतक्त्यात भारतीय संघ दुसऱ्या दिवशी पाच पदकांसह अव्वल स्थानावर कायम आहे.
मेक्सिको येथे सुरू असलेल्या या स्पर्धेतील महिलांच्या १० मीटर एअर पिस्तूल प्रकारातील अंतिम फेरीत मनूने २३७.५ गुणांसह सुवर्णपदक मिळवले. मेक्सिकोच्या अलेक्झांड्राला २३७.१ गुणांसह रौप्यपदकावर समाधान मानावे लागले. फ्रान्सच्या सेलिन गोबेरव्हिल्लीने २१७.० गुणांसह ब्राँझपदक मिळवले. भारताच्या यशस्विनीसिंग देस्वालला (१९६.१ गुण) चौथ्या स्थानावर समाधान मानावे लागले. मोसमातील या पहिल्या वर्ल्ड कप स्पर्धेत भारताने पहिल्या दिवशी एक सुवर्ण आणि दोन ब्राँझपदकांची कमाई केली होती. दुसऱ्या दिवशीही भारतीय नेमबाजांकडून चमकदार कामगिरीची अपेक्षा होती. अकरावीत शिकणाऱ्या मनूने भारतीयांना निराश केले नाही. मनू ही नुकतीच या वर्षीच्या ब्यूनोस आर्यस युवा ऑलिंपिक गेम्ससाठी पात्र ठरली आहे. २४ शॉट्सच्या अंतिम फेरीत भारताच्या दोन नेमबाजांनी अंतिम फेरी गाठली होती. पण, खरी चुरस ही मनू आणि अलेक्झांड्रा यांच्यातच रंगली. या दोघांनी सुरुवातीपासूनच आघाडी राखली होती. त्यामुळे चुरस शेवटच्या शॉट्सपर्यंत रंगली. यात अखेरच्या शॉट्सला मनूने १०.६ गुण मिळवले, तर अलेक्झांड्राला केवळ ८.८ गुणच घेता आले. तत्पूर्वी, पात्रता फेरीत जर्मनीची अॅना कोराकाकी ५८० गुणांसह अव्वल स्थानी होती, तर अलेक्झांड्रा ५७९ गुणांसह दुसऱ्या स्थानावर होती. सेलिन ५७५ गुणांसह तिसऱ्या स्थानावर होती. मनूने पात्रता फेरीत ५७२ गुण मिळवून पाचवे, तर यशस्विनीने ५७१ गुण मिळवून सातवे स्थान मिळवले होते.
पदक मिळवल्यानंतर मनू म्हणाली, 'पहिलीच वर्ल्ड कप स्पर्धा असल्याने सुवर्णपदक जिंकल्याचा आनंद अधिक आहे. हे यश आगामी स्पर्धेत मला आणखी चांगली कामगिरी करण्यासाठी प्रेरणादायी ठरेल.' राष्ट्रीय रायफल असोसिएशनचे अध्यक्ष रनिंदर सिंग म्हणाले, 'भारतासाठी ही स्वप्नवत सुरुवात आहे. युवा नेमबाज, ज्यांच्यावर भारतीय नेमबाजीचे भविष्य अवलंबून आहे, त्यांनी या स्पर्धेत आपली छाप पाडली आहे. आशा आहे भविष्यातील स्पर्धेतही या नेमबाजांकडून अशीच कामगिरी होईल. लहान वयातच मनूने आपले कौशल्य दाखवून दिले. दुसरीकडे, रवीकुमारसारख्या नेमबाजाने मागील वर्षभरापासून कामगिरीत सातत्य राखले आहे. आम्हाला या स्पर्धेतून आणखी काही पदकांची आशा आहे.'
पुरुषांच्या १० मीटर एअर रायफल प्रकारात हंगेरीच्या इस्तावान पेनीने २४९.५ गुणांसह सुवर्णपदक मिळवले. ऑस्ट्रियाच्या अलेक्झांडर स्कमिर्लने २४८.७ गुणांसह रौप्यपदक मिळवले. रवीकुमारने २२६.४ गुणांसह ब्राँझपदक मिळवले. भारताचा दीपककुमार २०५.८ गुणांसह चौथ्या स्थानावर राहिला. अर्थात अंतिम फेरीत ब्राँझपदकासाठी झालेल्या शूट-ऑफमध्ये रवीने दीपकला मागे टाकले. रवीकुमारचे हे वर्ल्ड कपमधील पहिलेच पदक ठरले. गेल्या वर्षी तो तीन वेळा वर्ल्ड कपच्या अंतिम फेरीत पोहोचला होता. मात्र, तिन्ही वेळा त्याला पदकाने हुलकावणी दिली होती. तत्पूर्वी, पात्रता फेरीत रवीकुमार ६२६.९ गुणांसह दुसऱ्या, तर दीपककुमार ६२५.२ गुणांसह सहावे स्थान मिळवले होते.
भारताची युवा नेमबाज मनू भाकेर हिने आयएसएसएफ स्पर्धेत दोन वेळा वर्ल्ड कप फायनल्स स्पर्धेतील विजेत्या अलेक्झांड्रा झॅवाला हिला मागे टाकून सुवर्णपदकाची कमाई केली. या स्पर्धेतील हे भारताचे दुसरे सुवर्णपदक ठरले. भारताच्या रवीकुमारने ब्राँझपदक मिळवले. यामुळे पदकतक्त्यात भारतीय संघ दुसऱ्या दिवशी पाच पदकांसह अव्वल स्थानावर कायम आहे.
मेक्सिको येथे सुरू असलेल्या या स्पर्धेतील महिलांच्या १० मीटर एअर पिस्तूल प्रकारातील अंतिम फेरीत मनूने २३७.५ गुणांसह सुवर्णपदक मिळवले. मेक्सिकोच्या अलेक्झांड्राला २३७.१ गुणांसह रौप्यपदकावर समाधान मानावे लागले. फ्रान्सच्या सेलिन गोबेरव्हिल्लीने २१७.० गुणांसह ब्राँझपदक मिळवले. भारताच्या यशस्विनीसिंग देस्वालला (१९६.१ गुण) चौथ्या स्थानावर समाधान मानावे लागले. मोसमातील या पहिल्या वर्ल्ड कप स्पर्धेत भारताने पहिल्या दिवशी एक सुवर्ण आणि दोन ब्राँझपदकांची कमाई केली होती. दुसऱ्या दिवशीही भारतीय नेमबाजांकडून चमकदार कामगिरीची अपेक्षा होती. अकरावीत शिकणाऱ्या मनूने भारतीयांना निराश केले नाही. मनू ही नुकतीच या वर्षीच्या ब्यूनोस आर्यस युवा ऑलिंपिक गेम्ससाठी पात्र ठरली आहे. २४ शॉट्सच्या अंतिम फेरीत भारताच्या दोन नेमबाजांनी अंतिम फेरी गाठली होती. पण, खरी चुरस ही मनू आणि अलेक्झांड्रा यांच्यातच रंगली. या दोघांनी सुरुवातीपासूनच आघाडी राखली होती. त्यामुळे चुरस शेवटच्या शॉट्सपर्यंत रंगली. यात अखेरच्या शॉट्सला मनूने १०.६ गुण मिळवले, तर अलेक्झांड्राला केवळ ८.८ गुणच घेता आले. तत्पूर्वी, पात्रता फेरीत जर्मनीची अॅना कोराकाकी ५८० गुणांसह अव्वल स्थानी होती, तर अलेक्झांड्रा ५७९ गुणांसह दुसऱ्या स्थानावर होती. सेलिन ५७५ गुणांसह तिसऱ्या स्थानावर होती. मनूने पात्रता फेरीत ५७२ गुण मिळवून पाचवे, तर यशस्विनीने ५७१ गुण मिळवून सातवे स्थान मिळवले होते.
पदक मिळवल्यानंतर मनू म्हणाली, 'पहिलीच वर्ल्ड कप स्पर्धा असल्याने सुवर्णपदक जिंकल्याचा आनंद अधिक आहे. हे यश आगामी स्पर्धेत मला आणखी चांगली कामगिरी करण्यासाठी प्रेरणादायी ठरेल.' राष्ट्रीय रायफल असोसिएशनचे अध्यक्ष रनिंदर सिंग म्हणाले, 'भारतासाठी ही स्वप्नवत सुरुवात आहे. युवा नेमबाज, ज्यांच्यावर भारतीय नेमबाजीचे भविष्य अवलंबून आहे, त्यांनी या स्पर्धेत आपली छाप पाडली आहे. आशा आहे भविष्यातील स्पर्धेतही या नेमबाजांकडून अशीच कामगिरी होईल. लहान वयातच मनूने आपले कौशल्य दाखवून दिले. दुसरीकडे, रवीकुमारसारख्या नेमबाजाने मागील वर्षभरापासून कामगिरीत सातत्य राखले आहे. आम्हाला या स्पर्धेतून आणखी काही पदकांची आशा आहे.'
पुरुषांच्या १० मीटर एअर रायफल प्रकारात हंगेरीच्या इस्तावान पेनीने २४९.५ गुणांसह सुवर्णपदक मिळवले. ऑस्ट्रियाच्या अलेक्झांडर स्कमिर्लने २४८.७ गुणांसह रौप्यपदक मिळवले. रवीकुमारने २२६.४ गुणांसह ब्राँझपदक मिळवले. भारताचा दीपककुमार २०५.८ गुणांसह चौथ्या स्थानावर राहिला. अर्थात अंतिम फेरीत ब्राँझपदकासाठी झालेल्या शूट-ऑफमध्ये रवीने दीपकला मागे टाकले. रवीकुमारचे हे वर्ल्ड कपमधील पहिलेच पदक ठरले. गेल्या वर्षी तो तीन वेळा वर्ल्ड कपच्या अंतिम फेरीत पोहोचला होता. मात्र, तिन्ही वेळा त्याला पदकाने हुलकावणी दिली होती. तत्पूर्वी, पात्रता फेरीत रवीकुमार ६२६.९ गुणांसह दुसऱ्या, तर दीपककुमार ६२५.२ गुणांसह सहावे स्थान मिळवले होते.