रात्र झाल्यामुळे संयुक्त विजेतेपद

म. टा. क्रीडा प्रतिनिधी, मुंबई

यंदाच्या मुंबई महापौर चषक खोखो स्पर्धेच्या व्यावसायिक गटाच्या अंतिम फेरीत पश्चिम रेल्वे व मध्य रेल्वे या संघांना संयुक्त विजेतेपद देण्यात आले. केशवराव दाते उद्यान, दादर येथे पार पडलेल्या या स्पर्धेतील व्यावसायिक गटाच्या अंतिम फेरी उभय संघात बरोबरी झाली तसेच रात्रही बरीच झाल्याने शेवटी दोन्ही संघांना संयुक्त विजेतेपद देण्यात आले. (५-५-५-५) १० विरुद्ध १० अशा रंगतदार अवस्थेत सामना बरोबरीत सुटला.

पश्चिम रेल्वेकडून अमित पाटील २.३०, १:१० मिनिटे पळतीचा खेळ केला. त्याला अमोल जाधव (२ व १:४० मिनिटे), प्रसाद राडीये (१.४०, १.४० मिनिटे आणि एक गडी) रंजन शेट्टी व मजहर जमादार (प्रत्येकी ३ गडी) यांची उत्तम साथ दिली. मध्य रेल्वेतर्फे मिलिंद चावरेकरने (एक व १:१० मिनिटे संरक्षण आणि ४ गडी) तर विजय हजारे (१:२०, १:३० मिनिटे संरक्षण, ३ गडी), दीपेश मोरे (१:५०, २:३० मिनिटे संरक्षण) यांनीही तोलामोलाची साथ दिली.