व्हॉलिबॉलमध्ये महाराष्ट्राला रौप्य

पुणे : महाराष्ट्राच्या मुलींना खेलो इंडिया यूथ गेम्समधील व्हॉलिबॉल स्पर्धेत रौप्यपदकावर समाधान मानावे लागले. शिवछत्रपती क्रीडानगरीतील बॅडमिंटन हॉलमध्ये व्हॉलिबॉल स्पर्धा झाली. १७ वर्षांखालील मुलींच्या अंतिम लढतीत पश्चिम बंगालने महाराष्ट्रावर २५-१५, २५-१३, २५-१४ असा विजय नोंदविला. पश्चिम बंगालच्या विजयात देवांशी आणि ईशा घोष यांनी मोलाचा वाटा उचलला. महाराष्ट्राकडून श्रुती मासळे, तेजस्विनी मलगुंडे यांनी दिलेली लढत अपुरी पडली. २१ वर्षांखालील मुलांच्या अंतिम लढतीत केरळने तमिळनाडूवर २१-२५, २१-१५, २५-२३, २५-२० असा विजय नोंदविला.

सुरभीची सरशी

टेबल टेनिसमधील २१ वर्षांखालील मुलींची अंतिम लढत काळजाचा ठोका चुकविणारी ठरली. पश्चिम बंगालच्या सुरभी पतवारीने पश्चिम बंगालच्याच कौशनी नाथवर ११-८, ११-५, १०-१२, १०-१२, ११-७, ११-७, ७-११, १६-१४ अशी संघर्षपूर्ण मात केली. कौशनीला मोक्याच्या क्षणी केलेल्या चुका भोवल्या. तिच्या सर्व्हिस चुकल्या. तिने चार मॅच पॉइंट मिळविले होते. मात्र, ही संधी तिला साधता आली नाही. महाराष्ट्राच्या सृष्टी हळेंगडीने ब्राँझ मिळविले.

२१ वर्षांखालील मुलांत गुजरातच्या मानुष शहाने पश्चिम बंगालच्या अनिर्बन घोषवर ११-८, ७-११, १०-१२, ११-९, ११-७, ८-११, ११-४ अशी मात केली.