राष्ट्रीय खोखो; महाराष्ट्र अजिंक्य

नागपूर : महाराष्ट्राच्या महिला संघाने सीनियर गट राष्ट्रीय खोखो स्पर्धेचे जेतेपद राखले. पुरुष गटाला मात्र महाराष्ट्राला अपयश आले. महिला गटातील अंतिम सामन्यात गतविजेत्या महाराष्ट्राने एअरपोर्ट अॅथॉरिटी ऑफ इंडिया संघाचे आव्हान एक मिनिट बाकी ठेवून एका गुणाने परतवून लावले. महाराष्ट्राची ऐश्वर्या शिंदे आणि पुरुष विभागात रेल्वेचा दीपेश मोरे सर्वोत्कृष्ट खेळाडू ठरला.

महिला गटातील अंतिम लढतीत महाराष्ट्राच्या खेळाडूंनी चमकदार कामगिरी केली. विश्रांतीला महाराष्ट्राकडे ४-२ अशी आघाडी होती. ऐश्वर्या सावंत एकूण ७ मिनिटे, तर प्रियंका भोपी एकूण ५ मिनिटे खेळली. मृणाल कांबळे व काजल भोरने प्रत्येकी २ गडी बाद केले. उपविजेत्या एअरपोर्ट अॅथॉरिटी ऑफ इंडियाची एम. विणा एकूण साडेसहा मिनिटे, सारिका काळे ३ मिनिटे २० सेकंद खेळली. के.एस. मेघाने २, पौर्णिमा सकपाळने ३ गडी बाद केले.तिसऱ्या क्रमांकाच्या लढतीत केरळने कोल्हापूरला पराभवाचा धक्का दिला. तत्पूर्वी, उपांत्य सामन्यात महाराष्ट्राने कोल्हापूरचा एक डाव शिल्लक ठेवीत ४ गड्यांनी धुव्वा उडवला. दुसऱ्या उपांत्य लढतीत एअरपोर्ट अॅथॉरिटी ऑफ इंडियाने केरळला पराभूत केले.

पुरुष गटातील अंतिम सामन्यात उत्कृष्ट खेळाचे प्रदर्शन करीत रेल्वेने महाराष्ट्राला १३-११ म्हणजे दोन गड्यांनी पराभूत केले. पहिल्या डावात नऊ मिनिटांत रेल्वेच्या खेळाडूंनी ८ गडी टिपले. रेल्वेचा अमोल जाधव एकूण ३ मिनिटे ५० सेकंद खेळला, अमित पाटील २ मिनिटे १० सेकंद खेळला व ३ गडी बाद केले. महाराष्ट्राचा नरेंद्र सावंत साडेतीन मिनिटे खेळला व एक गडी बाद केला. महेश शिंदे २ मिनिटे, तर प्रतीक वायकर ३ मिनिटे २० सेकंद खेळला व १ गडी बाद केला.तिसऱ्या स्थानाच्या लढतीत कोल्हापूरने कर्नाटकला पराभूत केले. उपांत्य सामन्यात महाराष्ट्राने कोल्हापूरला पराभूत केले.