श्रीकांतचा ऑस्ट्रेलियात विजयाचा झेंडा

मटा ऑनलाइन वृत्त । सिडनी

गेल्या रविवारी इंडोनेशिया सुपर सीरिजचं जेतेपद पटकावणाऱ्या भारताच्या कदाम्बी श्रीकांतनं आज ऑस्ट्रेलियात विजयाचा झेंडा फडकवून सलग दुसरी सुपर सीरिज जिंकण्याचा पराक्रम केला आहे. शक्ती आणि युक्तीच्या जोरावर त्यानं चीनच्या ऑलिम्पिक पदकविजेत्या चेन लाँगचं आव्हान २२-२०, २१-१६ असं मोडीत काढलं.

जागतिक क्रमवारीत सहाव्या स्थानी असलेल्या चेन लाँगनं याआधीच्या पाचही सामन्यांमध्ये श्रीकांतला नमवलं होतं. स्वाभाविकच, आजच्या लढतीतही त्याचं पारडं जड मानलं जात होतं. त्याची आक्रमक सुरुवात पाहून भारतीय बॅडमिंटनप्रेमींना धडकीच भरली होती. परंतु, श्रीकांतनं जराही न डगमगता आघाडीवर असलेल्या चेनला गाठलं आणि मग प्रत्येक पॉइंटसाठी त्यांच्यात 'काँटे की टक्कर' रंगली.

कधी श्रीकांत पुढे, तर कधी चेन, असं करता-करता दोघंही २०-२० पर्यंत पोहोचले आणि प्रेक्षकांच्या हृदयाचे ठोके वाढले. परंतु, पुढचे दोन्ही गुण घेऊन श्रीकांतनं पहिला गेम खिशात टाकला. त्यानंतर, त्याच्या वाढलेल्या आत्मविश्वाचा प्रत्यय दुसऱ्या गेममधील पहिलाच पॉइंट पाहून आला. ताशी ३३१ किमीचा झंझावाती स्मॅश हाणत त्यानं हा गुण मिळवला आणि तिथेच त्याच्या विजयाचे संकेत मिळाले. चेनला फारशी संधी न देता त्यानं आघाडी टिकवून ठेवली आणि २१-१६ने दुसरा गेम खिशात टाकत ट्रॉफीवरच नाव कोरलं.