कृष्णकुमार राणेला रौप्य

पतियाळाः महाराष्ट्राच्या कृष्णकुमार राणेला दुसऱ्या इंडियन ग्रांप्री अॅथलेटिक्स स्पर्धेत रौप्यपदकावर समाधान मानावे लागले. दरम्यान, शुक्रवारी झालेल्या या स्पर्धेद्वारे एकाही खेळाडूला ‘रिओ’चे तिकीट मिळविता आले नाही. १०० मी. धावण्याच्या शर्यतीत महाराष्ट्राच्या कृष्णकुमार राणेचे सुवर्ण थोडक्यात हुकले. राणेने १०.५७९ सेकंद वेळ नोंदविली. ओएनजीसीच्या महम्मद अब्दुल नजीब कुरेशीने १०.५७४ सेकंद वेळ नोंदवून सुवर्णपदक पटकावले. ऑलिम्पिकला पात्र ठरण्यासाठी १०.१६ सेकंद हा निकष होता. ४०० मीटरच्या शर्यतीत सुमीतकुमार ४७.४१ सेकंद वेळ नोंदवीत सुवर्ण, तर केरळच्या जितीन पॉलने ४७.५३ सेकंद वेळ नोंदवीत रौप्यपदक मिळविले. महिलांच्या १०० मी. शर्यतीत ओडिशाच्या द्युती चंदने राष्ट्रीय विक्रमाची नोंद केली. तिने ११.३७ सेकंद वेळ नोंदवीत सुवर्णपदक मिळविले. यासह द्युतीने २००० मध्ये रचिता मिस्त्रीने नोंदविलेला विक्रम (११.३८ से.) मोडला. मात्र, द्युतीला ऑलिम्पिक पात्रता निकष पार करता आला नाही. ऑलिम्पिकला पात्र ठरण्यासाठी ११.३२ सेकंद हा पात्रता निकष होता.

४०० मी. शर्यतीत ओएनजीसीच्या पूवम्माने ५२.६७ सेकंद वेळ नोंदवीत सुवर्णपदक पटकावले. केरळच्या अलिंदा थॉमसने ५३.१० सेकंद वेळ नोंदवीत रौप्य मिळविले. ऑलिम्पिकला पात्र ठरण्यासाठी ५२.२० सेकंद हा पात्रता निकष होता.