कुलदीप नेमारचा चाहता;
तर प्रणॉय मेस्सीचा
वृत्तसंस्था, कोलकाता
भारतीय फुटबॉल संघ वर्ल्ड कपमध्ये खेळत नसला, तरी भारतात फुटबॉलचे चाहते मोठ्या प्रमाणावर आहेत. ख्रिस्तियानो रोनाल्डो, मेस्सी आणि नेमार यांच्या चाहत्यांची संख्या भारतातही अधिक आहे. भारतीय खेळाडूही या तिघांचे चाहते आहेत.
भारताचा फिरकीपटू कुलदीप यादव हा ब्राझीलच्या नेमारचा चाहता आहे. २०१४च्या वर्ल्ड कपमध्ये ब्राझीलला आपल्याच देशात उपांत्य फेरीत जर्मनीकडून पराभव स्वीकारावा लागला. या दारुण पराभवाचा डाग नेमार या वेळी पुसून टाकेल, असा विश्वास कुलदीपला वाटतो. बॉक्सर अखिलकुमार आणि गोल्फर राहील गांगजी हे रोनाल्डोचे भक्त आहेत. पोर्तुगाल हा भारतानंतरचा आपला आवडता देश आहे, असे ते मानतात. बॅडमिंटनपटू एच. एस. प्रणॉय याचा मेस्सीवर जीव आहे, तर हॉकीचा माजी कर्णधार संदीपसिंग हा जर्मनीच या वेळी विजेतेपदाचे प्रमुख दावेदार असल्याचे मानतो.
अफगाणिस्तानविरुद्धची एकमेव कसोटी दोन दिवसांत गुंडाळल्यानंतर कुलदीपचे आता सारे लक्ष वर्ल्ड कप फुटबॉलवर आहे. '#मेरीदुसरीकंट्री' या नावाने अशा चाहत्यांचा शोध घेतला गेला तेव्हा त्यात कुलदीप म्हणाला, 'नेमारमुळे ब्राझील हा माझा आवडता संघ आहे. क्रिकेटचा हंगाम व्यग्र असला तरी मी मिळालेल्या वेळेत ब्राझीलला पाठिंबा देणार आहे. २०१४मध्ये जर्मनीने ब्राझीलला ७-१ असे पराभूत केले होते. तेव्हा दोन दिवस आपल्याला झोप आली नव्हती. तो पराभव वेदनादायक होता.' राष्ट्रकुल सुवर्णविजेता अखिल कुमारच्या मते रोनाल्डो सर्वोत्तम आहे. तो म्हणाला, 'मी रोनाल्डोचा मोठा चाहता आहे आणि त्याचे समाजकार्य मला आवडते. माझा पाठिंबा पोर्तुगालला आहे.' गोल्फर राहील गांगजी म्हणतो, की मी ५-६ वर्षांचा असताना वर्ल्ड कपदरम्यान मॉरिशसला गेलो होतो. तेव्हा मी माझ्या काकांसह फुटबॉलचे सामने पाहात असे. बॅडमिंटनपटू प्रणॉयला मेस्सीवर पूर्ण भरवसा आहे. लहानपणापासूनच आपण मेस्सीचे चाहते असल्याचे तो सांगतो. त्याच्या मते जर्मनी, फ्रान्स, ब्राझील आणि बेल्जियम हे उपांत्य फेरीतील संघ असतील.
हॉकीपटू संदीपसिंगला जर्मनीवर विश्वास आहे, तो त्यांचे प्रशिक्षक जोअकिम लो यांच्यामुळे. ज्या पद्धतीने लो जर्मनीच्या संघाला मार्गदर्शन करतात, ते पाहता वर्ल्ड कपमध्ये जर्मनी आपला वरचष्मा राखेल, असे संदीपला वाटते.