भारताच्या मल्लांना चार पदके

वृत्तसंस्था, नवी दिल्ली

भारताच्या मल्लांनी सहाव्या टिफ्सा जागतिक क्रीडा स्पर्धेमध्ये एका सुवर्णपदकासह एकून चार पदकांची कमाई केली. इंडोनेशियातील जकार्ता येथे ही स्पर्धा झाली. भारताच्या दालमियाने पुरुषांच्या ६० किलो वजनी गटामध्ये सुवर्णपदक पटकावले. अंतिम फेरीत त्याने अझरबैजानच्या महंमद सहानचा ४-१ असा पराभव केला. भारताचा लवसिंग ८० किलो गटात रौप्यपदक विजेता ठरला. अंतिम फेरीत अझरबैजानच्या महंमद आलिमने लववर ५-१ अशी मात केली.

याशिवाय नवीन कुमार आणि जोशील या भारतीय कुस्तीगिरांनी आपापल्या गटात ब्राँझपदक जिंकले. नवीनने ९० किलो गटात ब्राँझपदकाच्या लढतीत लिथुआनियाच्या ओलेग याला ५-२ असे पराभूत केले, तर जोशीलने सुपर हेवीवेट (९७ ते १२५ किलो) गटात अफगाणिस्तानच्या मुस्तफा सुलतानीचा ३-१ ने पराभव करून ब्राँझपदकावर नाव कोरले.