सरिताला ब्राँझ

नवी दिल्ली : भारताची माजी विश्वविजेती बॉक्सर एल. सरिता देवी हिला सिलेसियन ओपन बॉक्सिंग स्पर्धेमध्ये अखेर ब्राँझपदकावर समाधान मानावे लागले. पोलंडमधील ग्लिवाईस येथे सुरू असलेल्या या स्पर्धेमध्ये ६० किलो गटाच्या उपांत्य फेरीत कझाखस्तानच्या करिना इब्रागिमोवाने सरिताला ५-० असे एकतर्फी हरवले. या स्पर्धेत भारताच्या लव्हलिना बोर्गोहेन (६९ किलो) आणि पूजा रानी (८१ किलो) या बॉक्सरनाही उपांत्य फेरीत पराभव पत्करावा लागला. दरम्यान, एम. सी. मेरी कोम (४८ किलो) आणि मनीषा (५४ किलो) या भारतीय बॉक्सरनी आपापल्या गटात अंतिम फेरी गाठली असून युवा गटामध्ये भारताच्या ज्योती गुलियाने ५१ किलो गटामध्ये अंतिम फेरीत प्रवेश केला आहे.