भारताची कुस्तीपटू पूजा धांडाचा विश्वास
वृत्तसंस्था, नवी दिल्ली
टोकियो ऑलिंपिक २०२१ पर्यंत पुढे ढकलण्यात आल्यामुळे उपलब्ध झालेल्या कालावधीचा पुरेपूर फायदा करून घेऊ, असा विश्वास भारताची पदकविजेती कुस्तीपटू पूजा धांडाने व्यक्त केला आहे.
जागतिक अजिंक्यपद स्पर्धेत ब्राँझपदक पटकावणाऱ्या पूजाला महिलांच्या ५७ किलो गटात टोकियो ऑलिंपिकमधील स्थान निश्चित करण्यात अपयश आले होते. तिच्याऐवजी अंशु मलिकची या वजनी गटासाठी भारतातर्फे निवड झाली. तथापि, आता ऑलिंपिक पुढे ढकलण्यात आल्यामुळे पुन्हा ऑलिंपिक प्रवेश मिळवण्याचा जोमाने प्रयत्न करू, असे मत पूजाने व्यक्त केले. २०१९ मध्ये मला दुखापतींचा सामना करावा लागला आणि त्याचा परिणाम माझ्या कामगिरीवर झाला. साहजिकच ऑलिंपिक पात्रता फेरीतील माझी कामगिरी सुमार होती. तथापि, आता ऑलिंपिक पुढे ढकलण्यात आल्यामुळे मी आनंदी आहे. मला खेळातील कोणत्या पैलूंवर अधिक मेहनत घ्यावी लागेल, याचा आराखडा मी तयार केला आहे आणि लॉकडाउनचा कालावधी संपल्यानंतर मी त्यादृष्टीने प्रयत्न सुरू करेन, असे पूजा म्हणाली.
ऑलिंपिक पुढे ढकलण्यात आल्याच्या वृत्तावर सुरुवातीला विश्वास बसला नसल्याचेही तिने सांगितले. हा माझ्यासाठी आश्चर्याचा धक्का होता. अखेर मला कामगिरी सुधारण्याची आणि पुन्हा एकदा ऑलिंपिक प्रवेशासाठी प्रयत्न करण्याची संधी मिळणार आहे, असे पूजा म्हणाली. सध्या पूजा हरियाणामधील हिस्सार येथील तिच्या घरी असून येथे उपलब्ध असणाऱ्या साहित्यासह व्यायाम सुरू असल्याचे तिने सांगितले. मला बऱ्याच कालावधीनंतर कुटुंबासोबत इतका वेळ घालवण्यास मिळाला आहे. पुन्हा ही संधी कधी मिळेल, हे माहीत नाही, अशी पुस्तीही तिने जोडली.
भारतीय कुस्ती संघटनेने (डब्ल्यूएफआय) १६ मार्चपासून आयोजित करण्यात आलेली पुरुष व महिला प्रशिक्षण शिबिरे रद्द केली, तेव्हा परिस्थिती इतकी बिकट बनेल, याची कल्पनाही केली नव्हती, असेही पूजा म्हणाली. त्यानंतर, लॉकडाउन सुरू होताच हा कालावधी आणखी लांबणार आहे, याची मला जाणीव झाली आणि मी त्यादृष्टीने फिटनेस आणि आहाराकडे लक्ष देण्यास सुरुवात केली, असेही तिने सांगितले.
कोट
भारताचे महिला कुस्ती प्रशिक्षक अँड्य्रू कूक हे अमेरिकेत त्यांच्या घरी असले, तरी ते आम्हाला व्हॉट्सअॅपद्वारे मार्गदर्शन करतात आणि आम्ही पाहिलेल्या व्हिडिओंचे विश्लेषण करून आमच्या प्रगतीचा आढावा घेतात. त्यासाठी आम्ही एक ग्रुप तयार केला असून यासंबंधीची सर्व माहिती आम्हाला तिथे मिळते.
- पूजा धांडा, भारताची कुस्तीपटू
...............