श्रीकांत मुंढेचा ‘दस का दम...’

Gopal.gurav@timesgroup.com
महाराष्ट्राचा मध्यमगती वेगवान गोलंदाज श्रीकांत मुंढेने इंग्लंडमधील कॉलविन बे क्रिकेट क्लबकडून खेळताना बर्केनहेड संघाविरुद्ध डावात १० विकेट घेण्याची किमया केली. लिव्हरपूल प्रीमिअर लीगमध्ये डावात दहा विकेट घेणारा तो पहिलाच गोलंदाज ठरला आहे. १९९९मध्ये प्रीमिअर विभागाची स्थापना झाली. त्यानंतर अशी कामगिरी कोणालाही जमली नव्हती. पुण्याचा २७ वर्षीय श्रीकांत एप्रिल महिन्यात इंग्लंडमध्ये गेला. येथे तो इंग्लंड क्रिकेट बोर्डाच्या प्रीमिअर लीग अंतर्गत असलेल्या लिव्हरपूल आणि डिस्ट्रिक्ट क्रिकेट लीगमध्ये खेळतो आहे. आतापर्यंत तो यातील २२ लढतींत खेळला आहे. पेनर्हायन क्रिकेट मैदानावर शनिवारी झालेल्या लढतीत श्रीकांतने दहा विकेट घेण्याची करामत करून दाखवली. भारताच्या अनिल कुंबळेने १९९९मध्ये पाकिस्तानविरुद्ध फिरोझशाह कोटला मैदानावर डावात दहा विकेट घेण्याची किमया केली होती. तसेच, पुण्यातील क्रिकेट स्पर्धेत प्रतीक छल्लारेने डावात दहा विकेट घेतल्या होत्या. बर्केनहेड पार्कच्या कर्णधाराने नाणेफेक जिंकून प्रथम फलंदाजी स्वीकारली. मात्र, त्याचा हा निर्णय श्रीकांतने चुकीचा ठरविला. डावाच्या पहिल्याच षटकात श्रीकांतने माइक बर्न्सला पायचीत टिपले. खातेही न उघडता माइक तंबूत परतला. यानंतर श्रीकांतने टप्प्यात मारा सुरूच ठेवला. त्याच्या जाळ्यात बर्केनहेडचे एक-एक फलंदाज सापडत गेले. यानंतर त्याने अॅडम नील, अॅडम पटेल, ल्युक कॅमडेन यांचा त्रिफळा उडविला.श्रीकांतने बर्केनहेडचा निम्मा संघ ८२ धावांत माघारी पाठवला होता. ख्रिस डेव्हिसने काही वेळ मैदानावर टिकाव धरला. पण, श्रीकांतसमोर त्याचाही निभाव लागला नाही. बघता बघता बर्केनहेडचा संघ ४८.१ षटकांत १६८ धावांत गारद करण्यात श्रीकांतला यश आले. यातील सहा फलंदाजांना श्रीकांतने एकेरी धावसंख्येवरच माघारी पाठवले. डावातील निम्मी षटके एकट्या श्रीकांतनेच टाकली. त्याने २४.१ षटकांत ८५ धावा देत दहा फलंदाजांना माघारी पाठवले. कॉलविन बे संघाचा कर्णधार पी. ए. जेनकिन्सने श्रीकांतच्या गोलंदाजीला साजेसे क्षेत्ररक्षण लावले. बर्केनहेडचा दहावा फलंदाज रविंदा पल्लियागुरुगेला श्रीकांतने बाद केले, तेव्हा संघसहकाऱ्यांनी एकच जल्लोष केला. एवढेच नाही, तर श्रीकांतने फलंदाजीतही मोठा वाटा उचलला. त्यामुळे कॉलविन बे संघाला एका विकेटनी विजय मिळवता आला. कॉलविन बे संघाने विजयी लक्ष्य ५७.५ षटकांत ९ विकेटच्या मोबदल्यात पूर्ण केले. यात श्रीकांतने ११२ चेंडूंत ६ चौकारांसह नाबाद ४४ धावा केल्या. मधल्या फळीत खेळणारा श्रीकांत शेवटपर्यंत मैदानावर होता. त्याने तळाच्या फलंदाजांना साथीला घेत कॉलविन बे संघाचा विजय साकारला. त्याने २२ लढतींत ४०७ धावा केल्या आहेत. कॉलवेन बे संघाचा तो प्रमुख गोलंदाज झाला आहे. त्याने ६० विकेट मिळवल्या आहेत. यात डावात पाच विकेट घेण्याची कामगिरी त्याने पाच वेळा केली आहे. श्रीकांत हा महाराष्ट्र रणजी संघाकडून खेळतो. आयपीएलमध्ये तो पुणे वॉरियर्स संघाचा सदस्य होता. डावात दहा विकेट घेण्याचे माझे स्वप्न होते. मात्र, हे स्वप्न कधी साकार होणार हे माहिती नव्हते. हा योग लंडनमध्ये जुळून आला. गेल्या अनेक वर्षांच्या मेहनतीचे माझे हे फळ आहे. त्यामुळे आनंद होणे स्वाभाविक आहे, असे श्रीकांत मुंढे म्हणाला. श्रीकांत अशी कामगिरी एक दिवस नक्की करणार, यावर माझा विश्वास होता. क्रिकेट हे त्याचे पॅशन आहे. लहानपणापासून क्रिकेटशिवाय त्याने दुसरा कसलाच विचार केलेला नाही. त्याचेच हे फळ आहे, असे श्रीकांतचे वडील श्रीहरी मुंढे म्हणाले.
...