वरळीत जलद बुद्धिबळ
मुंबई : चेस व्हिजनतर्फे विविध वयोगटांसाठी जलद बुद्धिबळ स्पर्धेचे आयोजन करण्यात आले आहे. रविवार, २९ जुलै रोजी ही स्पर्धा बिर्ला सेंच्युरियन,कोवर्क्स, सेंचुरी मिल कंपाऊंड, पांडुरंग बुधकर मार्ग, वरळी येथे होत आहे. ८, १०, १२ आणि १५ वर्षांखालील मुले या स्पर्धेत सहभागी होऊ शकतात. पहिल्या क्रमांकाला १५०० रु.चे पारितोषिक असेल. शिवाय सर्व सहभागी स्पर्धकांना प्रमाणपत्र देण्यात येतील. मुंबई शहर बुद्धिबळ संघटनेच्या मान्यतेने ही स्पर्धा होत आहे. २८ जुलैपर्यंत इच्छुकांनी सहभाग नोंदवावा. संपर्क : नितीन कांबळे ९९२०८३८२१२, विहंग कुलकर्णी ९९२०४११२४१.
महाराष्ट्र कुस्ती लीग
२ नोव्हेंबरपासून रंगणार
मुंबई : खाशाबा जाधव यांच्यापासून सुरू झालेली आंतरराष्ट्रीय स्पर्धांमधील कुस्तीची परंपरा अलीकडेच झालेल्या राष्ट्रकुल स्पर्धेत सुवर्णपदावर आपलं नाव कोरून राहुल आवारेने कायम ठेवली. महाराष्ट्रातल्या या कुस्तीला घराघरात पोहोचविण्यासाठी झी टॉकीज, 'महाराष्ट्र कुस्ती लीग'च्या माध्यमातून प्रयत्न करणार आहे. या महाराष्ट्र कुस्ती लीगचा थरार २ ते १८ नोव्हेंबर या कालावधीत पुण्यातील बालेवाडीच्या शिवछत्रपती क्रीडा संकुलात रंगणार आहे. महाराष्ट्रातील नावाजलेल्या कुस्तीगिरांना राष्ट्रीय आणि आंतरराष्ट्रीय कुस्तीगिरांशी लढताना बघण्याची पर्वणी आपल्या झी टॉकीजवर प्रेक्षकांना मिळणार आहे. याबद्दल बोलताना झी टॉकीजचे व्यवसायप्रमुख बवेश जानवलेकर म्हणतात की, 'महाराष्ट्र कुस्ती लीग'च्या माध्यमातून कुस्तीगिरांना एक नवे आणि भव्य व्यासपीठ उपलब्ध करून देणे ही आमच्यासाठी अभिमानाची गोष्ट आहे. लवकरच फ्रँचाइजी निश्चित केले जातील.'
महाराष्ट्र कुस्ती लीगला महाराष्ट्र राज्य कुस्तीगीर परिषद आणि अखिल भारतीय कुस्ती महासंघाची मान्यता लाभली आहे. या लीगमध्ये राष्ट्रीय तसेच आंतरराष्ट्रीय मल्ल आपले कौशल्य दाखवतील.