मुंबई : अमर हिंद मंडळ-दादरतर्फे वर्धापन दिनानिमित्त आयोजित आंतर शालेय खोखो स्पर्धेत महात्मा गांधी विद्यामंदिरने मुलांचे व मुलींचे असे दुहेरी विजेतेपद पटकाविताना प्रतिस्पर्ध्यावर निर्विवाद वर्चस्व राखले. अंतिम सामन्यात महात्मा गांधी विद्यामंदिरच्या मुलांनी डॉ. शिरोडकर हायस्कूलचा एक डाव व ४ गुणांनी तर महात्मा गांधी विद्यामंदिरच्या मुलींनी सेंट इझाबेल स्कूलचा एक डाव व ६ गुणांनी धुव्वा उडविला. महात्मा गांधी विद्यामंदिरच्या अद्वितीय कामगिरीत धीरज भावे, गणेश हेगरे, रामचंद्र हेगरे, अर्जुन अनिवसे आणि काजल गायकवाड, मुस्कान नाईक, साक्षी वाकेळकर, सिद्धी हिंदळेकर यांचा खेळ प्रमुख ठरला.
दादर-पश्चिम येथील अमर हिंद मंडळाच्या क्रीडांगणावर मुलांच्या निर्णायक सामन्यात महात्मा गांधी विद्यामंदिरच्या धीरज भावे, गणेश हेगरे, रामचंद्र हेगरे व अर्जुन अनिवसे यांचा अष्टपैलू खेळ थोपविताना डॉ. शिरोडकर हायस्कूलच्या खेळाडूंची आक्रमणात व संरक्षणात पुरती दमछाक झाली. शिरोडकरच्या प्रतिक घाणेकर व निखील पाडावे यांनी पळतीचा छान खेळ केला.
मुलीच्या अंतिम सामन्यात महात्मा गांधी विद्यामंदिरच्या काजल गायकवाडचा दमदार पळतीचा खेळ, साक्षी वाकेळकरच्या झंझावाती आक्रमणात गारद झालेले ४ खेळाडू आणि मुस्कान नाईक व सिद्धी हिंदळेकर यांचा अष्टपैलू खेळ यामुळे सेंट इझाबेल स्कूलच्या मुलींना प्रतिस्पर्ध्यांचे आव्हान पेलवले नाही. त्यामुळे महात्मा गांधी विद्या मंदिरने एक डाव राखून ९-३ असा मोठा विजय प्राप्त केला आणि विजेतेपदासह दुहेरी मुकुट पटकाविला. सेंट इझाबेलच्या आर्या तावडे व श्रावणी पवार यांनी छान खेळ केला.