विकास, मनोज यांना ब्राँझ

वृत्तसंस्था, बाकू (अझरबैजान)

गुरुवारीच ऑलिम्पक प्रवेश निश्चित करणारे भारताचे बॉक्सर विकास कृष्णन आणि मनोज कुमार यांना आंतरराष्ट्रीय बॉक्सिंग महासंघाच्या (आयबा) जागतिक अजिंक्यपद बॉक्सिंग स्पर्धेत अखेर ब्राँझपदकावर समाधान मानावे लागले.

या स्पर्धेत उपांत्य फेरी गाठणाऱ्या खेळाडूंना ऑलिम्पिक प्रवेश मिळणार होता. विकासने ७५ किलो गटात, तर मनोजने ६४ किलो गटात उपांत्य फेरीत प्रवेश करून ऑलिम्पिक प्रवेश निश्चित केला. उपांत्य फेरीत विकाससमोर तुर्कमेनिस्तानच्या अॅचिलोव्ह आर्सलनबेकचे आव्हान होते. विकासला उपांत्यपूर्व फेरीतील सामन्यादरम्यान जखम झाली होती. त्याची ही जखम भरली नसल्याने विकास उपांत्य लढत खेळण्यासाठी वैद्यकीयदृष्ट्या तंदुरुस्त नसल्याचे जाहीर करण्यात आले आणि आर्सलनबेकला पुढे चाल मिळाली. मनोजला उपांत्य फेरीत ब्रिटनचा युरोपियन विजेता पॅट मॅककोरमॅककडून ०-३ असा पराभव पत्करावा लागला. शुक्रवारी भारताच्या सुमीत सांगवानच्या ८१ किलो गटामध्ये ऑलिम्पिक प्रवेश मिळवण्याच्या आशा संपुष्टात आल्या. उपांत्यपूर्व फेरीमध्ये रशियाच्या अग्रमानांकित पीटर खामुकोवने सुमीतला पराभूत केले.

भारताचे प्रो-बॉक्सर प्राथमिक फेरीत

नवी दिल्ली : आशियाई विजेता नीरज गोयतसह भारताचे तीन बॉक्सर व्यावसायिक बॉक्सरसाठी होणाऱ्या ऑलिम्पिक पात्रता फेरीमध्ये झुंजणार आहेत. व्हेनेझुएला येथे ३ ते ८ जुलैदरम्यान ही स्पर्धा होणार आहे. नीरज हा ६९ किलो वजनी गटामध्ये खेळणार आहे. या गटात अद्याप भारताचा कोणीही बॉक्सर रिओ ऑलिम्पिकसाठी पात्र ठरलेला नाही. त्याच्याशिवाय गौरव बिदुरी (५२ किलो) आणि दिलबाग सिंग (८१ किलो) हे व्यावसायिक बॉक्सर पात्रता फेरीत खेळतील.