नवी दिल्ली : गतविजेत्या मनू अत्री-सुमीत रेड्डी यांनी लागोस आंतरराष्ट्रीय बॅडमिंटन स्पर्धेतील पुरुष दुहेरीचे विजेतेपद राखले. २५ हजार डॉलर रकमेची ही स्पर्धा नायजेरियामध्ये झाली. दुहेरीच्या अंतिम फेरीत अग्रमानांकित मनू-सुमीत जोडीने वैभव-प्रकाश राज जोडीवर २१-१२, २१-१२ अशी मात केली. महिला दुहेरीत कुहू गर्ग-रिया मुखर्जी जोडीने क्रिष्मा वाडेकर-व्ही. हरिका जोडीवर २१-१०, २१-१८ असा विजय मिळवला. यानंतर मिश्र दुहेरीत मनूने मनीषाच्या साथीने खेळताना कुहू-रोहन कपूर जोडीवर २१-१७, २२-२० अशी मात करून विजेतेपद मिळवले. याबरोबर मनूने दुहेरी मुकुटही मिळवला.
स्टेडियमचे नुकसान
पालेमबांग (इंडोनेशिया) : एका स्थानिक फुटबॉल लढतीनंतर इंडोनेशियाच्या नागरिकांनी येथील गेलोरा श्रीविजया स्टेडियमचे नुकसान केले. या स्टेडियमचा वापर आगामी आशियाई स्पर्धेसाठी करण्यात येणार आहे. श्रीविजया एफसी आणि एरेमा एफसी यांच्यातील लढतीनंतर चिडलेल्या समर्थकांनी मैदानातील प्लास्टिकच्या खुर्च्यांची मोडतोड केली आणि त्या खुर्च्या मैदानात भिरकावल्या. जवळपास ३३५ खुर्च्यांचे नुकसान झाले आहे. यात पोलिसांनी चारजणांना अटक केली आहे. आशियाई स्पर्धेच्या आयोजनासाठी इंडोनेशिया मेहनत घेत असून, त्यात या घटनेने त्यांची डोकेदुखी वाढली आहे.
महिलांचा पराभव
नवी दिल्ली : भारताच्या १७ वर्षांखालील मुलींच्या फुटबॉल संघाला ब्रिक्स स्पर्धेत चीनकडून १-२ असा पराभव स्वीकारावा लागला. मनीषाने २५व्या मिनिटाला फ्री-किकवर गोल करून भारताला आघाडी मिळवून दिली. मात्र, यानंतर भारताची गोलकीपर अर्चनाने उत्कृष्ट बचाव करून चीनला रोखले. यानंतर ७४व्या मिनिटाला चीनकडून पेनल्टीवर गोल झाला आणि याच्या आठ मिनिटानंतर चीनने दुसरा गोल करून विजय मिळवून दिला.
७३४ खेळाडूंची निवड
नवी दिल्ली : भारतीय क्रीडा प्राधिकरणाने (साई) 'खेलो इंडिया' अंतर्गत स्कॉलरशिपसाठी ७३४ खेळाडूंची निवड झाली आहे. त्यांना वार्षिक १.२ लाख रुपये देण्यात येणार आहे. हे पैसे त्यांच्या सराव, दुखापत आणि इतर गोष्टींवर खर्च करण्यात येणार आहेत. खेलो इंडिया अंतर्गत गुणवान खेळाडूंची निवड करण्यात येत असून, त्यांना चांगेल व्यासपीठ मिळवून देण्याचा प्रयत्न आहे.
...