म. टा. प्रतिनिधी, औरंगाबाद
महिलांचे आरोग्य, सक्षमीकरण आणि सन्मानासाठी सतत कार्यशील असलेल्या गेट गोइंगतर्फे तीन फेब्रुवारी रोजी मॅरेथॉनचे आयोजन करण्यात आले आहे. 'रन फॉर हर' या संकल्पनेवर आधारित आयोजनात दोन हजार धावपटूंनी सहभाग घेतला आहे.
चिकलठाणा औद्योगिक वसाहतीतील कलाग्राम येथून रविवारी सकाळी साडेपाच वाजता मॅरेथॉनला प्रारंभ होणार आहे. दहा, पाच व तीन किलोमीटर अंतरांची मॅरेथॉन स्पर्धा होणार आहे. आत्तापर्यंत दोन हजार धावपटूंनी स्पर्धेत सहभाग नोंदवला आहे. तीन किलोमीटर अंतराच्या स्पर्धेचे वैशिष्ट्य म्हणजे 'रन फॉर कॉज' असणार आहे. यात अवयवदान ब्रेस्ट कॅन्सर आणि घरकाम करणाऱ्या महिला, पुरुषांसाठी शहरातील डॉक्टर तसेच प्रख्यात व्यक्ती धावणार आहेत.
मॅरेथॉन स्पर्धेत सहभागी झालेल्या स्पर्धकांना टी-शर्ट, बिबचे वाटप शनिवारी (दोन फेब्रुवारी) सकाळी दहा ते सहा या वेळेत कलाग्राम येथे करण्यात येणार आहे. धावपटूंनी आपले साहित्य या वेळेत घेऊन जावे असे आवाहन संयोजकांतर्फे करण्यात आले आहे.
मॅरेथॉनचे यंदाचे आठवे वर्ष आहे. मॅरेथॉनमधून गोळा होणारा निधी हा सामाजिक कार्यासाठी वापरला जाणार आहे. मॅरेथॉनच्या यशस्वी आयोजनासाठी डॉ. भावना लोहिया, डॉ. सुजाता लाहोटी, डॉ. उमा महाजन, डॉ. संतोष तोतला, डॉ. निती सोनी, डॉ. प्रिया देशमुख, डॉ. चारुशिला देशमुख, डॉ. संगीता देशपांडे, निना निकाळजे, दीपा डबरी, डॉ. वंदना मिश्रा, निरुपमा नागोरी, दीप्ती खेमका आदींनी पुढाकार घेतला आहे.