वृत्तसंस्था, नवी दिल्ली
पाचवेळा विश्वविजेतेपद जिंकणारी भारताची आघाडीची बॉक्सर मेरी कोम जागतिक महिला बॉक्सिंग स्पर्धेतील आपल्या सातव्या पदकाच्या दिशेने वाटचाल करते आहे. उपांत्यपूर्व फेरीत तिने ४८ किलो वजनी गटात चीनच्या वु यू ला ५-० असे पराभूत केले. मेरीसह लव्हलिना बोर्गोहेनने ६९ किलो वजनी गटात उपांत्य फेरीत धडक मारली आहे. तिने ऑस्ट्रेलियाच्या स्कॉट काये हिच्यावर ५-० असा विजय मिळविला.
या विजयानंतर मेरी म्हणाली की, ही लढत खूप कठीण नव्हती पण सोपीही नव्हती. चीनच्या अनेक बॉक्सर सध्या पुढे येत आहेत. मी अनेकांशी याआधी झुंजले आहे पण या स्पर्धकाला मी सामोरी गेले नव्हते. आता उपांत्य फेरीत मेरीची झुंज उत्तर कोरियाच्या किम ह्यांग मी हिच्याशी होईल. भारताच्या आणखी दोन खेळाडू मनिषा मौन (५४ किलो) आणि भाग्यबती कचरी (८१ किलो) यांना उपांत्यपूर्व फेरीत पराभव पत्करावा लागला.