माईक टायसन २९ सप्टेंबरला भारतात येणार
म.टा. क्रीडा प्रतिनिधी, मुंबई
जागतिक स्तरावर वैयक्तिक स्तरावर खेळला जाणारा मिक्स मार्शल आर्ट हा प्रकार आता सांघिक स्वरूपात सुरू करण्यात येणार असून वरळी येथील एनएससीआय स्टेडियममध्ये या कुमाईट १ लीगचे उदघाटन २९ सप्टेंबरला होणार आहे. या कार्यक्रमाचे वैशिष्ट्य म्हणजे या उदघाटनासाठी व्यावसायिक बॉक्सिंगमध्ये दबदबा निर्माण करणारा हेविवेट बॉक्सर माईक टायसन याची उपस्थिती. टायसन यानिमित्ताने प्रथमच भारतात येणार आहे. त्याच्या उपस्थितीत या लीगची पहिली लढत खेळविली जाणार आहे.
या लीगमध्ये आठ देशांचे संघ सहभागी होऊन एकमेकांशी सामना करतील. या संघांमध्ये युएई, रशिया, चीन, ब्रिटन, अमेरिका, पाकिस्तान व बहारीन यांचा समावेश आहे. स्पर्धेतील प्रत्येक संघात ९ खेळाडू असतील, त्यात २ महिलाही असतील. मोहम्मद अली बुधवानी यांनी या लीगसंदर्भात माहिती देताना सांगितले की, चित्रपट क्षेत्रातील एखादी व्यक्ती या खेळाशी जोडलेली असण्यापेक्षा खेळाडू असावा, अशी अपेक्षा असल्यामुळे आम्ही टायसनशी संपर्क साधला. बऱ्याच प्रयत्नानंतर तो तयार झाला. ऑल इंडिया मिक्स मार्शल आर्ट संघटना आणि वर्ल्ड किकबॉक्सिंग नेटवर्क यांच्या सहकार्याने ही लीग सुरू करण्यात येणार आहे.
ही लीग वैयक्तिक करण्यापेक्षा सांघिक करण्यामागचा उद्देश म्हणजे चाहत्यांची संख्या वाढविण्याचा प्रयत्न. देशांचे प्रतिनिधित्व करणारे संघ असतील, तर चाहत्यांचा मोठा पाठिंबाही मिळू शकेल. या लीगमध्ये भारतातील कंथराज अगासा, सुमित खाडे, हरदीप राय, मोहम्मद फरहाद, मनजीत कोलेकर व प्रियंका जित हे खेळाडूही सहभागी होणार आहेत. या लीगच्या माध्यमातून भारतातील गुणवत्ता शोधण्याचा प्रयत्नही केला जाणार आहे. या लीगमधील गुणांकनासाठी खास असे सॉफ्टवेअर तयार करण्यात आले आहे.