म. टा. प्रतिनिधी, औरंगाबाद
अरिफ खान स्मृती फुटबॉल स्पर्धेत मोहमादिया फ्रेंडन्स क्लब संघाने अटीतटीच्या झुंजीत यंग स्पोर्टिंग संघावर सडनडेथवर ४-३ असा पराभव करीत विजेतेपद पटाकावले.
आमखास मैदानावर ही स्पर्धा झाली. अंतिम सामन्यात मोहमादिया फ्रेंडन्स क्लब व यंग स्पोर्टिंग अ संघ यांच्यातील जेतेपदाची लढत अखेरच्या क्षणापर्यंत रंगतदार झाली. अंतिम सामन्यात प्रारंभ होताच अवघ्या काही सेकंदात मोहमादिया फ्रेंडन्स संघाने गोल करण्याची सुरेख संधी दवडली. फैजान गोल करण्यात अयशस्वी ठरला. त्यानंतर यंग स्पोर्टिंग संघाने सामन्यावर नियंत्रण मिळवले. छोटे छोटे पासेस, गॅप पासेसचा सुरेख खेळ करीत यंग स्पोर्टिंगच्या खेळाडूंनी सामन्यातील रोमांच वाढवला. सुरेख ताळमेळ व समन्वय चांगला असल्याने यंग स्पोर्टिंगला गोल करण्याच्या दोन-तीन संधी मिळाल्या. परंतु, त्या त्यांनी दवडल्या. निर्धारित वेळेत सामना गोलशून्य स्थितीत संपला.
शुटआऊटमध्ये उभय संघांना पाच पेनल्टी स्ट्रोक करण्याची संधी मिळाली. त्यात उभय संघांनी प्रत्येकी तीन गोल केले. त्यामुळे सामना पुन्हा ३-३ बरोबरीत संपला. यंग स्पोर्टिगकडून मोहंमद समेदा, शेख हमीद, अजमत खान यांनी एकेक गोल नोंदवले. अबुजर व सोहेल यांनी गोल करण्याची संधी दवडली. मोहमादिया फ्रेंडन्स संघाच्या फरहान, अन्नस, शारेख यांनी एकेक गोल केले. फैजान व कासीमचे गोल हुकले. सडनडेथमध्ये मोहमादिया फ्रेंडन्स संघाच्या बबलूने निर्णायक गोल करीत संघाला विजेतेपद मिळवून दिले. यंग स्पोर्टिंगच्या नवीद नजीर गोल करण्यात यशस्वी ठरू शकला नाही. त्यामुळे त्यांना उपविजेतेपदावर समाधान मानावे लागले.
पारितोषिक वितरण सोहळ्यास समीर साजेद, अबिस खान, मुन्शी पटेल, इम्रान सालार, कलिमोद्दिन, इम्तियाज, फुटबॉल संघटनेचे अध्यक्ष शकील खान, सय्यद सलिमोद्दिन, शेख बाबर, नुर, शौकत खान, माजिद मौलाना, मसुद हाश्मी, सय्यद अख्तर अली, लियाकत हुसेन कादरी, खलिल पटेल यांची प्रमुख उपस्थिती होती. प्रमुख अतिथींच्या हस्ते विजेत्या व उपविजेत्या संघांना पारितोषिकांचे वितरण करण्यात आले. कार्यक्रमास मोहसीन नजीर, लईक खान, डॉ. मोहंमद बदरोद्दिन, रिझवान हाफिज, आमेर खान, सादिक, शेख नदीम, मोहंमद रियाजउद्दिन यांची उपस्थिती होती. यंग स्पोर्टिंग ब संघास उत्कृष्ट नवोदित संघाचा पुरस्कार देण्यात आला. उत्कृष्ट गोलरक्षक सलमान (मोहमादिया फ्रेंडन्स), बचावपटू अरबाज खान (यंग स्पोर्टिंग अ), मिडफिल्डरचा पुरस्कार अजमत खान (यंग स्पोर्टिंग अ), फॉरवडपटू अन्नस (मोहमादिया फ्रेंडन्स) यांना पुरस्कार प्रदान करण्यात आले. स्पर्धेतील सर्वोत्कृष्ट खेळाडू म्हणून यंग स्पोर्टिंग अ संघाच्या नवीद नजीरची निवड करण्यात आली. मोहंमद रियाजउद्दिन यांनी सूत्रसंचालन केले. डॉ. मोहंमद बदरोद्दिन यांनी आभार मानले.