म. टा. क्रीडा प्रतिनिधी, मुंबई
पहिल्या पटावर भारताचा ग्रँडमास्टर दीपन चक्रवर्तीने प्रथम मानांकित ग्रँडमास्टर अमानातोव्ह फारुखवर २८ चालीत मात केली आणि दहाव्या मुंबई महापौर चषक आंतरराष्ट्रीय अ गट बुध्दिबळ स्पर्धेमधील सातव्या फेरीत सनसनाटी विजय मिळवून सहावा गुण नोंदविला.
भारताचा ग्रँड मास्टर निलोत्पल दासने चौथा मानांकित बांगलादेशचा ग्रँड मास्टर रेहमान झिऔरला तर युक्रेनचा ग्रँडमास्टर तुखेव अॅडमने भारताचा इंटरनॅशनल मास्टर सायंतन दासला हरवून संयुक्त प्रथम क्रमांकाची सहा गुणांसह आघाडी घेतली.
सातव्या फेरीतील द्वितीय मानांकित भारताचा ग्रँड मास्टर दिप्तयान घोषसह अन्य अग्रस्थानी आघाडीवीरांनी मात्र सातवा साखळी सामना बरोबरीमध्ये ठेवत दुसऱ्या क्रमांकाच्या ५.५ गुणांसह संयुक्त आघाडीत राहिले.
वांद्रे येथील माउंट लिटेरा स्कूल इंटरनॅशनल सभागृहामधील एल.आय.सी. व अंकित जेम्स पुरस्कृत स्पर्धेमधील पहिल्या पटावर दीपन चक्रवर्ती विरुद्ध अमानातोव्ह फारुख यामधील सामना सिसिलियन बचाव पद्धतीने सुरु झाला. दीपनने नेजडोर्फ पध्दतीचा वापर करीत फारुखच्या राजावर जोरदार हल्ला चढविला.
सतराव्या चालीत फारुखने दीपनच्या घोड्यावर हल्ला केला. त्याचा बळी देत दीपनने आक्रमण अधिक तीव्र केले. त्यानंतर उंटाचे आमिष दाखवून दीपनने प्रतिस्पर्ध्याच्या राजाला कोंडीत पकडले आणि २८ व्या चालीला फारुखने पराभव मान्य केला.