स्पर्धा पुढे ढकलल्याबद्दल १० कोटी दंड भरण्याचा इशारा
वृत्तसंस्था, नवी दिल्ली
गोवा येथे होणारी प्रस्तावित राष्ट्रीय क्रीडा स्पर्धा तब्बल तीनवेळा पुढे ढकलण्यात आल्यानंतर आता ती रद्द होण्याच्या मार्गावर आहे. ३६व्या राष्ट्रीय क्रीडा स्पर्धेच्या आयोजनात ही चालढकल केल्याबद्दल गोवा ऑलिम्पिक असोसिएशनने १० कोटींचा दंड भरावा अन्यथा स्पर्धा रद्द केली जाईल, असा इशारा भारतीय ऑलिम्पिक संघटनेने (आयओए) दिला आहे.
आयओएने नियुक्त केलेले राष्ट्रीय क्रीडा स्पर्धेच्या तांत्रिक समितीचे प्रमुख मुकेश कुमार यांनी यासंदर्भात सांगितले की, लवकरच आयओएचे प्रतिनिधी मंडळ गोव्याला या स्पर्धेच्या तारखांवर शिक्कामोर्तब करण्यासाठी जाणार आहे. तरीही गोव्याला १० कोटी दंड भरावाच लागेल. जर ही रक्कम त्यांनी दिली नाही तर आयओए ही स्पर्धा रद्द करेल.
गोव्याने यावर्षीही स्पर्धा मार्च-एप्रिलमध्ये निवडणुकांमुळे स्पर्धा घेण्यास असमर्थता दर्शविली होती. या काळात खेळाडू व स्पर्धेचे संरक्षण, स्वयंसेवक अशा मुद्द्यांवर गोवा सरकारने स्पर्धा पुढे ढकलण्याचा प्रस्ताव ठेवला होता. ही स्पर्धा खरे तर २०१६मध्ये होणार होती. त्यानंतर यावर्षी ही स्पर्धा ३० मार्च ते १४ एप्रिल या कालावधीत घेण्याचे ठरले. त्यानंतर गोवा सरकारने ऑक्टोबर-नोव्हेंबरमध्ये स्पर्धेची नवी तारीख दिली.
गोव्यात ३६वी स्पर्धा झाल्यानंतर यावर्षी छत्तीसगड, उत्तराखंड (२०२०) आणि मेघालय (२०२२) याठिकाणी स्पर्धा होणार आहेत. पण अद्याप गोव्याचीच स्पर्धा झालेली नसल्यामुळे या स्पर्धा कशा होणार याविषयी संभ्रम आहे.