राष्ट्रीय पदकविजेत्यांचा शौचालयाजवळ बसून रेल्वेप्रवास

mahesh.vichare@timesgroup.com
mvichareMT

मुंबई :

उत्तर प्रदेशच्या अयोध्येतील नंदिनीनगर येथे पार पडलेल्या राष्ट्रीय कुस्ती स्पर्धेत महाराष्ट्राच्या कुस्तीगीरांनी अभिमानास्पद कामगिरी केली खरी, पण त्याचा आनंद परतीच्या रेल्वे प्रवासात क्षणोक्षणी मावळत गेला. साकेत एक्स्प्रेसची प्रतीक्षा यादीतील तिकिटे कन्फर्म न झाल्याने या खेळाडूंना तिकीट तपासनीसांकडून अवमानास्पद वागणूक मिळालीच, शिवाय धक्के खात, शौचालयाला खेटून, दरवाजाजवळ बसून उपाशीपोटी तब्बल ३० ते ३५ तास प्रवास करावा लागला.

महाराष्ट्राच्या कुस्तीगीरांनी राष्ट्रीय स्पर्धेत सुवर्णपदकासह पाच पदके जिंकून आतापर्यंतची सरस कामगिरी नोंदवली, पण त्यांच्या या कामगिरीची खडतर आणि अपमानास्पद अशा फैजाबाद-पुणे प्रवासामुळे रयाच गेली. हे पदकविजेते खेळाडू शौचालयाजवळ बसून प्रवास करत होते. तिथेच झोपही घ्यावी लागत होती. दुर्गंधीचा त्रास सहन करत, कधी दरवाजापाशी बसून, कधी उभे राहून, उपाशीपोटी या खेळाडूंना प्रवास करावा लागला. जवळपास ३०-३५ तासांच्या या प्रवासात महाराष्ट्राच्या कुस्तीचे हे भविष्य कोमेजून गेले. त्यातही मुलींची अधिक परवड झाली. त्यांनाही याच परिस्थितीत प्रवास करावा लागला. त्यातच तिकीट तपासनीसांनी मुलींना जनरल डब्यात पिटाळले. 'आम्ही केलेल्या कामगिरीला, महाराष्ट्राच्या कुस्तीला काही प्रतिष्ठा आहे की नाही', अशी उद्विग्न भावना खेळाडूंनी 'मटा'कडे बोलून दाखविली.


पदाधिकाऱ्यांचा मात्र विमानप्रवास

खेळाडूंना एकीकडे अशा वाईट अवस्थेत प्रवास करावा लागत असताना, संघटनेचे पदाधिकारी मात्र वातानुकूलित डब्यातून किंवा विमानातून प्रवास करत असल्याबद्दलही खेळाडूंनी संताप व्यक्त केला. या खेळाडूंना मिळणारा दैनंदिन भत्ताही कमी होता. पाच-सहा दिवसांच्या स्पर्धेसाठी प्रत्येकाला अवघे ४००-५०० रुपयेच मिळाले. कुस्तीगीर परिषदेला नुकत्याच झालेल्या लीगमधून तसेच देशात होणाऱ्या स्पर्धांतून भरघोस पैसे मिळत असताना ते खेळाडूंवर कधी खर्च होणार, असा सवालही उपस्थित होत आहे.

'महाराष्ट्र कुस्तीगीर परिषदेची यात कोणतीही चूक नाही. आम्ही सव्वा महिन्यापूर्वी तिकिटे काढली होती, पण ती प्रतीक्षा यादीतच होती. अखेरच्या क्षणी काहीही करणे शक्य नव्हते. - दिनेश गुंड, संघ प्रशिक्षक