जलतरणात महाराष्ट्राच्या महिलांचे वर्चस्व

मुंबई : महाराष्ट्राच्या महिलांनी ग्लेनमार्क सीनियर राष्ट्रीय जलतरण स्पर्धेत आपल्या वर्चस्वाची मोहोर उमटविली. स्पर्धेच्या चौथ्या दिवशी एकूण ६ सुवर्ण, ७ रौप्य व २ ब्राँझपदकांसह महिलांनी महाराष्ट्राच्या यशात मोलाचा वाटा उचलला. एकूण १७ पदकांसह महाराष्ट्र दुसऱ्या स्थानी असून त्यातील १५ पदकं ही महिलांनीच जिंकली आहेत. रेल्वे स्पोर्टस बोर्ड २१ पदकांसह पहिल्या क्रमांकावर आहे. मुख्य म्हणजे रेल्वेची ही सर्व पदकं पुरुषांनीच जिंकली आहेत. स्पर्धेच्या चौथ्या दिवशी ५० मीटर फ्रीस्टाइल प्रकारात आदिती धुमटकरने २६.९८ सेकंदांत शर्यत पूर्ण करत सुवर्ण पटकावले तर महाराष्ट्राच्याच अवंतिका चव्हाणने २७.१३ सेकंद अशी वेळ देत रौप्य तर गुजरातच्या माना पटेलने २७.७३ सेकंदांसह ब्राँझ जिंकले. महाराष्ट्राच्या आदिती आणि अवंतिका या ५० मीटर फ्रीस्टाइलमध्ये वेगवान महिलाही ठरल्या. ४ बाय २०० मीटर फ्रीस्टाइल रिलेत महाराष्ट्राच्या महिलांनी सहज सुवर्णपदक जिंकले. आदिती धुमटकर, रायना सालढाणा, मोनिक गांधी व आकांक्षा बुचडे यांचा समावेश असलेल्या महाराष्ट्राच्या संघाने ९ मिनिटे ३.०६ सेकंद अशी वेळ दिली. कर्नाटकला यात दुसऱ्या क्रमांकावर समाधान मानावे लागले. महाराष्ट्राच्या पुरुषांनी एक रौप्य व एक ब्राँझपदक पटकावले आहे.

दोन विक्रमांची नोंद

१९ वर्षांच्या सलोनी दलाल या कर्नाटकच्या खेळाडूने २०० मीटर ब्रेस्टस्ट्रोक प्रकारात २ मिनिटे ४४.३७ सेकंद अशी वेळ देत सुवर्ण जिंकले आणि राष्ट्रीय विक्रमही केला. रेल्वेच्या पुरुष संघाने ४ बाय २०० मीटर प्रकारात ७ मिनिटे आणि ४५.२४ सेकंद अशी वेळ देत नवा राष्ट्रीय विक्रम नोंदवला. त्यात सजन प्रकाश, अरन डिसुझा, सानु देबनाथ व सौरभ सांगवेकर यांचा समावेश होता.

रेल्वेच्या अरन डिसुझाने २३.२९ सेकंद अशी वेळ देत ५० मीटर फ्रीस्टाइल प्रकारात वेगवान जलतरणपटू ठरण्याचा मान मिळवला. गुजरातच्या अंशुल कोठारीचे सुवर्ण जिंकण्याचे स्वप्न अगदी थोडक्यात हुकले. त्याने २३.३१ सेकंद अशी वेळ देत रौप्य पटकावले.