महाराष्ट्र उपांत्य फेरीत

मुंबईः भारतीय रेल्वे विरुद्ध आंध्र प्रदेश तर महाराष्ट्र विरुद्ध हरयाणा यांच्यात ६४व्या राष्ट्रीय महिला कबड्डी स्पर्धेच्या उपांत्य झुंजी रंगणार आहेत. बिहार येथील पाटलीपुत्र क्रीडा संकुल-पाटणा येथे सुरू असलेल्या पहिल्या उपउपांत्य लढतीत भारतीय रेल्वने पंजाबला ४५-३० असे पराभूत करत उपांत्य फेरी गाठली. दुसऱ्या उपउपांत्य सामन्यात आंध्र प्रदेशने उत्तर प्रदेशला २७-२० असे नमवित दिमाखात उपांत्य फेरीत प्रवेश केला. महाराष्ट्राने चंडीगढवर ३६-१९असा विजय मिळवीत उपांत्य फेरी गाठली.
मध्यंताराला १३-०९ अशी आघाडी घेणाऱ्या महाराष्ट्राने नंतर मात्र जोशपूर्ण खेळ करीत हा मोठा विजय मिळविला. पूर्वार्धात खेळाडूंचा अंदाज घेत सावध खेळ करीत महाराष्ट्राने अवघी ४गुणांची आघाडी घेतली होती. नंतर मात्र त्यांनी मुसंडी मारली. सायली जाधवने चंडीगडवर दोन लोन देण्यात महत्वाची भूमिका बजावली. तिला चढाईत अभिलाषा म्हात्रे, कोमल देवकर यांची छान साथ लाभली, तर सुवर्णा बारटक्के, दीपिका जोसेफ, पूजा पवार यांनी पकडीची छान साथ दिली. हरयाणाने हिमाचल प्रदेशला ३२-२४ असे नमवून उपांत्य फेरी गाठली.