क्रीडा संघटनांवर हवेत ‘सर्जिकल स्ट्राइक्स’

पाकिस्तान आणि काळ्या पैशावर करण्यात आलेल्या ‘सर्जिकल स्ट्राइक्स’नंतर आता असे हल्ले अपात्र लोकांचा भरणा असलेल्या अनेक क्रीडासंघटनांवर होणे आवश्यक आहे, असे मत मध्य प्रदेशचे मुख्यमंत्री शिवराज चौहान यांनी व्यक्त केले. रिओ ऑलिम्पिकमध्ये रौप्यपदक जिंकणारी भारताची आघाडीची बॅडमिंटनपटू पी. व्ही. सिंधूचा सत्कार चौहान यांच्या हस्ते करण्यात आला. सिंधूला तिची आई आणि प्रशिक्षक पी. गोपीचंद यांच्या उपस्थितीत ५० लाखांचे बक्षीस देण्यात आले.

मुख्यमंत्री चौहान म्हणाले, ज्यांचा खेळाशी काहीही संबंध नाही ते लोक क्रीडा संघटनांमधील खुर्च्या अडवून बसले आहेत. त्यांना खेळाबद्दल कसलीही आस्था नाही. खरे तर, ज्यांना खेळाबद्दल आस्था, प्रेम आहे ते तिथे हवेत. राजकारणात खिलाडुवृत्ती असली पाहिजे पण खेळात राजकारण नको, असे म्हटले जाते पण भारतात अनेकवेळा याच्या उलटच चित्र पाहायला मिळते. खेळामुळे आपल्या आयुष्यात आनंद निर्माण होतो. म्हणूनच आम्ही मध्य प्रदेश सरकारमध्ये ‘आनंद खाते’ तयार केले आहे.