म. टा. क्रीडा प्रतिनिधी, नागपूर
क्रीडा भारती, नागपूरतर्फे रविवारी आयोजित डॉ. हेडगेवार स्मृती अखंड भारत दौड स्पर्धेत १४ वर्षांखालील मुलांमध्ये नेहाल उके, मुलींमध्ये कशीश भगत, १६ वर्षांखालील मुलांमध्ये सौरभ तिवारी व मुलींमध्ये हर्ष पवनीकर अव्वल स्थानी राहिले.
रेशीमबाग परिसरातून प्रारंभ झालेली स्पर्धा याच ठिकाणी समाप्त झाली. डॉ. हेडगेवार स्मृती अखंड भारत दौडीचे संस्थापक आणि क्रीडा भारतीचे माजी मंत्री बबनराव बडिये यांना श्रद्धांजली अर्पण करून स्पर्धा प्रारंभ करण्यात आली. १४ वर्षांखालील मुलींची २ किलोमीटर अंतराची स्पर्धा नेहाल उकेने सर्वात कमी वेळेत पूर्ण करीत अव्वल स्थानी राहिला. ललित अतकरे दुसऱ्या, तर सुयश मोटघरे तिसऱ्या स्थानावर होते. मुलींच्या गटात कशीश भगतने बाजी मारली. आस्था निंबार्ते व नम्रता अतकरे यांनी द्वितीय व तृतीय स्थान पटकावले. १६ वर्षांखालील मुलांच्या गटातील २ किलोमीटर अंतराच्या स्पर्धेत सौरभ तिवारी विजेता ठरला. तर अमन शाहू व प्रणय मोटघरे यांनी दुसरे व तिसरे स्थान पटकावले. मुलींच्या गटात हर्षा पवनीकरने बाजी मारली. रविना बिजेवार दुसऱ्या, तर प्रणाली मेंढे तिसऱ्या स्थानी राहिली.
ज्येष्ठ क्रीडा संघटक सिद्धार्थन अॅन्थोनी यांच्या अध्यक्षतेखाली झालेल्या पुरस्कार वितरण सोहळ्यात क्रीडा प्रशिक्षक राजू कावरे व क्रिकेटपटू अमित देशपांडे यांच्या हस्ते दोन्ही वयोगटातील मुला-मुलींच्या गटात पहिल्या तीन स्थानांवरील धावपटूंना पुरस्कार प्रदान करण्यात आले. संचालन त्रिलोचन खरवडे यांनी केले. याप्रसंगी क्रीडा भारतीचे अखिल भारतीय कार्यकारिणी सदस्य संजय लोखंडे, मोहन पाटील, प्रकाश निकम, मंगेश पौनीकर, राजेंद्र भोसले, संजय बाटवे, गजानन आकरे, भूषण फटिंग उपस्थित होते.
...............