अर्धमॅरेथॉन विजेत्या रावतची अॅथलेटिक्स संघटनेवर टीका

नवी दिल्ली : दिल्ली अर्धमॅरेथॉनमध्ये भारतीय पुरुषांच्या गटात सुवर्णपदक पटकावणाऱ्या नीतेंद्रसिंह रावतने आपला राष्ट्रीय शिबिरासाठी समावेश न केल्याबद्दल भारतीय अॅथलेटिक्स महासंघावर (एएफआय) टीका केली.

पुढील वर्षी होणाऱ्या राष्ट्रकुल आणि आशियाई स्पर्धेच्या तयारीसाठी एएफआयतर्फे राष्ट्रीय शिबिर आयोजित करण्यात आले होते. तथापि, नीतेंद्रची कामगिरी पुरेशी चांगली नसल्याने एएफआयने त्याची या शिबिरासाठी निवड केली नाही. रविवारी याविषयी प्रतिक्रिया देताना नीतेंद्र म्हणाला, ‘मी स्वतःची क्षमता सिद्ध करण्यासाठीच दिल्ली अर्धमॅरेथॉनमध्ये सहभागी झालो होतो. राष्ट्रीय शिबिरासाठी निवड न झाल्यामुळे मी सध्या माझा लष्करी तळ असलेल्या राणीखेतमध्येच सराव करत आहे.’ रिओ ऑलिंपिकच्या मॅरेथॉनमध्ये सहभागी झालेल्या तीन भारतीय धावपटूंपैकी नीतेंद्र हा एक होता. या मॅरेथॉनमध्ये तो ८४ व्या स्थानावर राहिला होता. दरम्यान, मागील एक वर्षापासून नीतेंद्रची कामगिरी खालावल्याने राष्ट्रीय शिबिरामध्ये त्याचा समावेश करण्यात न आल्याचे स्पष्टीकरण एएफआयचे सचिव सी. के. वॉल्सन यांनी दिले.

लिगेस, अयाना विजेते. भारतीय गटात नीतेंद्र, सुरियाची बाजी

रविवारी झालेल्या दिल्ली अर्धमॅरेथॉनमध्ये इथिओपियाच्या बेरहानू लिगेस आणि अल्माझ अयाना या धावपटूंनी अनुक्रमे पुरुष व महिला गटात विजेतेपद पटकावले. भारतीय गटात पुरुषांमध्ये नीतेंद्रसिंह रावत, तर महिलांमध्ये एल. सुरिया विजेती ठरली.

या वर्षीचा सर्वोत्कृष्ट महिला अॅथलिटचा जागतिक पुरस्कार जिंकणाऱ्या अयानाने मागील वर्षी रिओ ऑलिंपिकमध्ये महिलांच्या १०,००० मीटर धावण्याच्या शर्यतीत नव्या विक्रमासह सुवर्णपदकावर नाव कोरले होते. त्यानंतर, तिने ट्रॅक धावपटूची कारकीर्द सोडून मॅरेथॉनपटू होण्याचा निर्णय घेतला. रविवारी अयानाने १ तास ७ मिनिटे व ११ सेकंदांमध्ये २१.०९७ किलोमीटरचे अंतर पूर्ण केले. अॅबाबेल येशानेह व नेत्सानेत गुडेटा या इथिओपियाच्याच धावपटूंनी महिला गटातील अनुक्रमे दुसरा व तिसरा क्रमांक मिळवला. पुरुषांच्या गटात बेरहानू लिगेसने ५९ मिनिटे ४६ सेकंद अशी वेळ नोंदवून विजेतेपद निश्चित केले. इथिओपियाचा एंडेमलाक बेलिहू दुसऱ्या, तर अमेरिकेचा लिओनार्ड कोरीर तिसऱ्या स्थानावर राहिला.

भारतीय गटात पुरुषांमध्ये विजेत्या ठरलेल्या नीतेंद्रसिंह रावतने १ तास ३ मिनिटे ५३ सेकंदांमध्ये शर्यत पूर्ण केली. महिलांमधील विजेत्या एल. सुरियाने १ तास १० मिनिटे ३१ सेकंद अशी वेळ नोंदवली.