मॅच पॉईंट वाचवत पेस-राजाची बाजी

मेलबर्नः लिअँडर पेस व पुरव राजा बुजूर्ग जोडीने शनिवारी ऑस्ट्रेलियन ओपन टेनिस स्पर्धेच्या उपउपांत्यपूर्व फेरीत धडक मारली. या दोन अनुभवी टेनिसपटूंचा विजय यासाठीदेखील महत्त्वाची आहे; कारण या दोघांनी मॅच पॉईंट वाचवत ब्रुनो सॉरेस (ब्राझिल) आणि जॅमी मरे (ब्रिटन) या पाचव्या सीडेड जोडीवर ७-६ (७-३), ५-७, ७-६ (८-६) अशी मात केली. जवळपास तीन तास हा सामना सुरू होता.

जागतिक दुहेरीच्या रँकिंगमध्ये डावखुरा जॅमी मरे नवव्या, तर सॉरेस दहाव्या क्रमांकावर आहे. गेल्या मोसमात त्यांनी सातत्यपूर्ण कामगिरीदेखील केली आहे; पण पुरव राजा याने नेट जवळ जबरदस्त खेळ करत मरे व सॉरेस यांना डोके वर काढण्याची संधीच दिली नाही. पहिल्या दोन्ही सेटमध्ये बघायला मिळालेली चुरस निर्णायक तिसऱ्या सेटमध्येही कायम होती. ही कोंडी ५-५ अशा बरोबरीपर्यंत कायम होती. या दरम्यान आघाडी घेणाऱ्या सॉरेस-मरे जोडीने मॅच पॉईंट मिळवला होता. एव्हाना नेट जवळ कौशल्यपूर्ण खेळ करणाऱ्या राजाने सर्व्हिसवरही गुण मिळवायलाही सुरुवात केली होती. राजानेच मरे-सॉरेसने मिळवलेला मॅच पॉईंट वाचवला; पण आपल्या दमदार सर्व्हिसने मॅच पॉईंट कमावलादेखील. यानंतर पेस-राजा जोडीने मागे वळून पाहिले नाही.

भारतीय जोडीने सामना खिशात टाकला तोदेखील राजाच्या अफलातून बॅकहँड रिटर्नवरच.

दृष्टिक्षेप

१)बिनसीडेड पेस व राजा या जोडीने पाचव्या सीडेड ब्रुनो सॉरेस-जॅमी मरे यांच्यावर ७-६ (७-३), ५-७, ७-६ (८-६) अशी मात केली.

२)पेस व राजा यांनी गेल्या मोसमात चॅलेंजर दर्जाच्या स्पर्धांमध्ये दुहेरीची दोन जेतेपदे पटकावली. या दोघांची एकत्र खेळताना ही दुसरीच ग्रँडस्लॅम स्पर्धा आहे.

३)२०१७च्या मोसमातील अमेरिकन ओपनमध्ये पेस-राजा यांना दुसऱ्याच फेरीत गाशा गुंडाळावा लागला होता.