लिअँडरने बाऊ करू नये

बेंगळुरू : उझबेकिस्तानविरुद्धच्या डेव्हिस चषक लढतीतील अंतिम चार खेळाडूंत स्थान निश्चित नाही, हे लिअँडर पेसला आधीच स्पष्ट केलेले असल्यामुळे वगळण्यात आल्याचा बाऊ त्याने अजिबात करू नये, असे मत भारतीय संघाचा न खेळणारा कर्णधार महेश भूपतीने व्यक्त केले आहे. लिअँडरऐवजी दुहेरीत भूपतीने रोहन बोपण्णाला प्राधान्य दिले होते. त्यावरून बरीच उलटसुलट चर्चा रंगली होती.

उझबेकिस्तानविरुद्धची लढत जिंकल्यानंतर पत्रकारांशी बोलताना भूपती म्हणाला की, लिअँडरने देशासाठी जे काही केले आहे, त्याचा आदर राखूनच त्याला संभाव्य सहा खेळाडूत स्थान देण्यात आले होते. पण आम्ही त्याच्यासमोर पर्यायही ठेवला होता. त्यामुळे अंतिम चारजणात निवडण्यात आले नाही म्हणून त्याने बाऊ करण्यात अर्थ नाही. भूपती म्हणाला की, मी पुन्हा सांगतो की, डेव्हिससाठी आपल्याला दुहेरीचा खास खेळाडू हवा असे मी मानत नाही. तरीही विचार करायचा झाला तर बोपण्णा हा दुहेरीचा सर्वोत्तम खेळाडू आहे. मी लिअँडरला फिटनेस चाचणी देण्यासाठी सुचविले होते. मला याचा अभिमान आहे की, त्याने चॅलेंजरमध्ये विजेतेपद पटकाविले पण रोहननेही आंतरराष्ट्रीय स्तरावर प्रतिनिधित्व केलेले आहे. त्यामुळे फिटनेस हा माझ्यादृष्टीने एक निकष होता.