विकेट्सच्या द्विशतकासाठी हवे दोन मोहरे
वृत्तसंस्था, अबुधाबी
पाकिस्तानचा फिरकी गोलंदाज यासिर शहाला सर्वांत कमी कसोटी क्रिकेट सामन्यांत २०० विकेट पूर्ण करण्याचा विक्रम रचण्याची संधी आहे. यासाठी त्याला न्यूझीलंडच्या दोन फलंदाजांना बाद करायचे आहे. सध्या पाकिस्तान आणि न्यूझीलंडदरम्यान तिसरा कसोटी सामना सुरू आहे. यात सोमवारी पहिल्या दिवसअखेर न्यूझीलंडने ७ बाद २२९ धावा केल्या. यात तीन बळी यासिरने मिळवले.
यासिरने जीत रावल, रॉस टेलर आणि हेन्री निकोल्स यांना बाद केले. त्यामुळे उपाहारापर्यंत न्यूझीलंडची ४ बाद ७३ अशी स्थिती होती. यानंतर केन विल्यमसनने न्यूझीलंडचा डाव सावरला. त्याने १७६ चेंडूंत ७ चौकारांसह ८९ धावा केल्या. आता न्यूझीलंडच्या अखेरच्या तीन पैकी दोन फलंदाजांना यासिरने बाद केले, तर त्याला २०० बळी ३३व्या कसोटीतच पूर्ण करता येणार आहे. सध्या यासिरच्या नावावर ३३ कसोटींत १९८ बळी जमा आहेत. सर्वांत कमी कसोटींत २०० बळीचा विक्रम सध्या ऑस्ट्रेलियाचे फिरकी गोलंदाज क्लॅरी ग्रिमेटच्या नावावर आहे. ग्रिमेट यांनी १९३६मध्ये ३६ कसोटींत २०० बळी पूर्ण केले होते.
स्कोअरबोर्ड : न्यूझीलंड ९० षटकांत ७ बाद २२९ (केन विल्यमसन ८९, जीत रावल ४५, वॅटलिंग खेळत आहे ४२, ग्रँडहोम २०, यासिर शहा ३१-९-६२-३, हसन अली १६-५-४६-१, शाहीन शहा आफ्रिदी १७-४-४३-१, बिलाल असीफ २४-२-५७-२) वि. पाकिस्तान.