म. टा. प्रतिनिधी, औरंगाबाद
परभणी जिल्हा बुद्धिबळ संघटनेतर्फे २७ व २८ जानेवारी रोजी पहिली शिवसेना प्रमुख बाळासाहेब ठाकरे स्मृती रॅपिड रेटिंग बुद्धिबळ स्पर्धेचे आयोजन करण्यात आले आहे.
परभणीचे खासदार संजय जाधव यांच्या पुढाकाराने या स्पर्धेचे आयोजन करण्यात आले आहे. शहरातील रेल्वेस्टेशन जवळ असलेल्या श्री मंगल कार्यालयात ही स्पर्धा दोन दिवस रंगणार आहे. या स्पर्धेतील विजेत्यांना एकूण ५० हजारांची रोख पारितोषिके देण्यात येणार आहेत. विजेत्यास दहा हजार रुपयांचे रोख पारितोषिक दिले जाईल. एकूण ५४ ट्रॉफीज विजेत्यांना देण्यात येणार आहेत.
शिवसेना प्रमुख कै. बाळासाहेब ठाकरे स्मृती रॅपिड रेटिंग बुद्धिबळ स्पर्धा प्रथमच घेण्यात येत आहे. या स्पर्धेच्या आयोजनासाठी विविध समित्यांची स्थापना करण्यात आली आहे. संयोजन समितीत दिलीप राके, अनिल शेलगावकर, संभाजी बिल्पे, प्रवीण भानेगावकर, रवींद्र पंडीत, चंद्रशेखर पोटेकर, आनंद देशमुख, धनराज कांकरिया, प्रीतम अबोटी, डॉ. अनिल दिवाण, स्वप्नील कानसूरकर, हितेंद्र उपाध्याय यांचा समावेश आहे. २७ जानेवारी रोजी दुपारी बारा वाजता पहिल्या फेरीस प्रारंभ होईल. २७ तारखेला एकूण पाच फेऱ्या होतील. २८ जानेवारीला चार फेऱ्या होणार आहेत. त्यानंतर पारितोषिक वितरण कार्यक्रम होणार आहे.